Heydər Əliyev Sarayında kimlər oxuya bilməz?   —  Müğənniləri düşündürən suala CAVAB 

Heydər Əliyev Sarayında Konsert Vermək: Müğənnilər Üçün Tələblər Nələrdir?

Heydər Əliyev adına Saray Bakı şəhərinin ən möhtəşəm mədəniyyət ocaqlarından biri hesab olunur. 1972-ci ildə istifadəyə verilən bu saray uzun illərdir ki, Azərbaycanın musiqi, incəsənət və dövlət tədbirlərinin əsas məkanlarından biridir. Müasir akustik sistemləri, geniş səhnəsi və minlərlə tamaşaçı tutumu ilə Saray həm yerli, həm də xarici sənətçilərin böyük konsertlərinə ev sahibliyi edir.

Burada təkcə musiqi proqramları deyil, həmçinin teatr tamaşaları, uşaq tədbirləri, rəsmi dövlət mərasimləri və beynəlxalq səviyyəli festivallar da təşkil olunur.

Saray Azərbaycan mədəniyyətinin inkişafında mühüm rol oynayan nüfuzlu məkan kimi tanınır və burada çıxış etmək sənətçilər üçün həm prestij, həm də peşəkarlığın göstəricisi sayılır.

Hətta,əksər sənətçilər fəxri ad almaqdan ötrü yolunu bu Saraydan salmalıdır.Çünki,Heydər Əliyev Sarayında çıxış etmək,solo konsert vermək  rəsmi olmasa da,praktikada rast gəlinən şərtlərdəndir.Heydər Əliyev Sarayı  həm də müğənninin özünü təsdiqi kimi də mühüm rol oynayır.

Sarayın siyasi əhəmiyyəti də böyükdür...

Heydər Əliyev Sarayının ikinci dövr fəaliyyəti  2006-2008-ci illərdə aparılan əsaslı təmir və yenidənqurma işlərindən sonra başladı. 

İkinci dəfə böyük səs çoxluğu ilə Prezident seçilən İlham Əliyevin 24 oktyabr 2008-ci ildə andiçmə mərasimi Sarayda keçirildi.

Heydər Əliyev Sarayının əsaslı təmir və yenidənqurma işlərindən sonra rəsmi açılışı isə SSRİ xalq artisti Zeynəb Xanlarovanın 2008-ci il 5 və 6 noyabrda keçirilən möhtəşəm solo konsertləri ilə oldu. Elə həmin vaxtdan Saray tam gücü ilə fəaliyyətə başladı.

Bundan sonra səhnədə dünya şöhrətli italyan müğənnisi Toto Kutunyonun, rus müğənniləri Vladimir Leontyevin, Vitasın, Rostropoviç adına II Beynəlxalq Musiqi Festivalının, Marinski Dövlət Akademik Opera və Balet Teatrının, məşhur gürcü kollektivi “Erisioni” Dövlət Mahnı Teatrının çıxışları olub. Türk müğənnisi Sərdar Ortac, hazırda Amerikada yaşayan soydaşımız, caz artisti Əzizə Mustafazadə, “Asiman” uşaq rəqs kollektivi, müxtəlif estrada artistlərimiz burada konsertlər veriblər. “Hökmdarın taleyi” və “Cavad xan” filmlərinin premyeraları Heydər Əliyev Sarayında nümayiş etdirilib.

İlham Zakir oğlu Qasımov  2023-cü ildən  Heydər Əliyev Sarayının direktorudur.

Bəs görəsən sarayda konsert vermək üçün müğənnilər hansı tələbləri bilməlidirlər?

Mövzu ilə bağlı bəzi təşkilatçı, prodüserlərin fikrini öyrəndik.

Həmçinin oxuyun

Məşhur polkovnik VƏFAT ETDİ 

DİQQƏT: Ölməzliyin şifrəsi tapıldı? — 150 il yaşamaq istəyənlərin gizli metodu: BİOHAKKİNQ!  

İşdən çıxarılan şəxslərin DİQQƏTİNƏ: Hansı ödənişləri və güzəştləri tələb edə bilərsiniz?

İbtidai sinif müəllimləri ilə bağlı VACİB AÇIQLAMA 

Aparıcı, prodüser Tarix Əliyev  Oxu24.com-a açıqlamasında bildirib ki, Heydər Əliyev adına Sarayın öz qayda-qanunu var:

"Qayda-qanun hansısa bir bayağı ifaçıyla deyil, onun repertuarı ilə bağlıdır. Burada birinci məqam  orada fanaqramanın heç bir zaman oxunmamasıdır. Fanaqram səsləndirmə burada qeyri-mümkündür. İkinci məqam oxunan mahnılardır. Dediyimiz kimi, bəzi ifaçıların bayağı mahnıları trenddə bir nömrə olsa da, onlar orada oxuna bilməz. Bu qayda çoxdan var",-deyə Tarix Əliyev bildirib.

Prodüser Asif Kərimovun sözlərinə görə isə  Heydər Əliyev Sarayında ifaçıların konsert verməsi üçün mütləq şəkildə repertuar uyğun gəlməlidir. Əks halda konsert təşkil edilə bilməz.

Heydər Əliyev Sarayında müğənnilərə qoyulan şərtlərlə bağlı sözügedən  Sarayın rəhbərliyindən məlumat almaq istəsək  də,suallarımız cavabsız qaldı.

Hazırladı: Çimnaz  Telmanqızı