İllər öncə  Qobustan rayonu  Qurbançı kənd ərazi dairəsinə məxsus olan və rayonun Qaracüzlü kəndi yaxınlığında  yerləşən  fermada azyaşlıların yanıb ölməsi barədə  məlumat vermişdik.

Qeyd olunan hadisə ilə bağlı  Oxu24.com   saytına müraciət edən yanaraq ölmüş  uşaqların  anası  Xuraman  Hacıyeva dəhşətli hadisənin onun həyatında silinməz izlər  buraxdığını və mənəvi-psixoloji  ağır zərbələr aldığını demişdi.

“Hadisədən 5 ildən artıq vaxt keçməsinə baxmayaraq hələ də özümə gələ bilməmişəm. Övladlarım  gözümün qabağında  yanıb kül  oldular. Balalarım yanmış məftilə  dönmüşdülər. Səsim  heç yerə  çatmadı.Çoban arvadı olduğum üçün bizi sahibsiz görüb başımızdan basdılar.  Bu gün həmin hadisədə günahkar olan hər kəsin adını açıqlayacam.Yoldaşımla mən 2015-ci ildən həmin fermada işləyirdik.Sözügedən ferma Füzuli rayonunun başçısı Alı Alıyevin  oğlu  Elvin   Alıyevə  məxsusdur. Bizi ora aparan zaman Elvin Alıyev vəd verdi ki,iki il burada işlədikdən  sonra sizə torpaq  sahəsi verəcəm və ev tikəcəm. Biz orada iki ilə yaxın işlədik. Sonra  başımıza bu bəla gəldi.Qışda  evi isitmək üçün Elvin Alıyev bizə mazut  gətirdi. Birinci gün özü mazutu qızdırıcı sobaya   doldurub,alışdırdı. Mən ilk gündən bunun təhlükəli yanacaq olduğunu ona bildirdim. İkinci  gün  soba  partladı,3 uşağım içəridə qaldı. Böyük qızım pəncərədən qaçıb,xilas  ola  bilsə  də,digər iki azyaşlı  övladlarım gözlərim baxa-baxa  yanıb  kül oldular.”

Xuraman Hacıyevanın iddiasına görə, fermanın sahibi imkanlı və vəzifəli şəxs olduğundan məsələni ört-basdır edə bilib. O,hətta indi bəzi saytlara məsuliyyətdən yayınmaq üçün bildirib ki, ferma  qayınatasına məxsusdur.

”Razıyam,ola bilər ki, ferma rəsmi sənədlər əsasında başqasının adına rəsmiləşsin.Amma biz sahibkar  kimi Elvini tanıyırıq. Bizə əməkhaqqını da o ödəyirdi. Onun atası Füzilinin icra başçısı işləyən Alı Alıyevi də  bir neçə dəfə dəora gələndə görmüşəm. Elvin Alıyev həmin vaxt polis orqanlarında  işləyirdi. Eşitdiyimə görə  indi işdən çıxıb. Əlaqələrindən istifadə edib,uşaqlarımın qanlarını  batırdılar. İş Prokurorluqda  araşdırılarkən  Elvin bizə deyirdi ki,sizə  köməklik edəcəm,şikayətçi olmayın.O, neçə ildir ki,bizi yola verir. İndi də telefon zənglərimizə  belə  cavab vermir. Bizim savadımız olmadığı üçün məzmununu bilmədiyimiz  sənədlərə qol çəkdirdilər. Guya biz şikayətçi deyilik. Halbuki,  mən həmin vaxtdan  hadisənin  şokunu yaşayıram.İki övlad itirən ana necə şikayətçi olmaya bilər?

Hadisə ilə bağlı  mətbuat vasitəsi ilə yenidən hüquq mühafizə orqanlarına müraciət etdim.
Azərbaycan Respublikasının Prezidenti cənab İlham Əliyevə və  Birinci vitse - prezident  Mehriban  xanım  Əliyevaya  səsləndim  və xahiş etdim ki, hadisənin əsl günahkarları  üzə çıxarılsın və cəzalarını  alsınlar. Sağolsun  cənab  Baş  prokuror Kamran Əliyevi.Sumqayıtda vətəndaşlarla  görüş zamanı   məni  qəbul etdi.Sonadək dinlədi. Dərhal işin yenidən araşdırılmasına dair  göstəriş  verdi. İnanıram  ki, əli mənim  balalarımın qanına batanlar hökumətimiz  tərəfindən  cəzalanacaq və  Allahın  qəzəbinə tuş  gələcək. Həyatda ən qulaqbatırıcı səs məzlumun susqunluğudur.4 il biz susduq.Elvin Alıyev bizim dərdimizə şərik olmaq əvəzinə,başımızdan basdı.İndi iş Baş prokuror  Kamran Əliyevin göstərişi əsasında Qobustan Rayon Prokurorluğunda yenidən araşdırılır. Əlbəttə,məni qane edən qərar verilməsə yenidən  şikayətlərimi davam etdirəcəm ”,-deyə  şikayətçi bildirib.

Nigar