Türkiyə Gültəkin Hacıyevanı Azərbaycana niyə verdi? 

Gültəkin Hacıbəylinin Türkiyədən deportasiyası, yəni Azərbaycana verilməsi ilə bağlı müxtəlif ittihamlar səsləndirilsə də, məsələ ilk növbədə hüquqi müstəvidə qiymətləndirilməlidir. Bu kontekstdə ən vacib məqam ondan ibarətdir ki, bir dövlətin ərazisində yaşamaq icazəsinə malik olmaq siyasi sığınacaq üçün müraciət etmiş sayılmaq anlamına gəlmir.

Bunu Almaniyada yaşayan tanınmış hüquq müdafiəçisi Əlövsət Əliyev deyib.

“2 illik (və ya istənilən müddətli) oturum icazəsi immiqrasiya hüququnun inzibati mexanizmidir, siyasi sığınacaq isə beynəlxalq hüququn və qaçqın statusunun tənzimlənməsi ilə bağlı ayrıca bir institutdur. Bu iki anlayış hüquqi baxımdan bir-birindən tam fərqlənir.

Əgər Gültəkin Hacıbəyli Türkiyədə siyasi sığınacaq üçün rəsmi müraciət etməyibsə, onun başqa bir dövlətin sorğusu əsasında deportasiya olunması mövcud beynəlxalq və milli hüquqi prosedurlar çərçivəsində həyata keçirilmiş addım kimi qiymətləndirilə bilər. Bu halda həmin prosesi avtomatik olaraq insan hüquqlarının pozulması kimi təqdim etmək hüquqi baxımdan mübahisəlidir və əsaslandırılmamışdır.

Bənzər hüquqi durum vaxtilə Hüseyn Abdullayev məsələsində də müşahidə olunmuşdur. O da Türkiyədə siyasi sığınacaq üçün rəsmi müraciət etmədiyi üçün nəticə etibarilə Azərbaycana təhvil verilmişdir.

Həmçinin oxuyun

Azərbaycanda iş yerləri ilə bağlı statistika: Paytaxt və region fərqi  

Azərbaycanda bu şəxslərin maaşları 35 faiz artacaq 

Bu halda pensiyanız KƏSİLƏCƏK -DİQQƏT!  

DİN əməliyyat keçirib: Bakıda tutulan 20 yaşlı oğlanın şok əməlləri üzə çıxdı   —    VİDEO

Digər tərəfdən, əgər Gültəkin Hacıbəyli Türkiyədə rəsmi şəkildə siyasi sığınacaq üçün müraciət etmiş olsaydı, beynəlxalq hüququn “geri göndərməmə” (non-refoulement) prinsipi əsas götürülərək, onun işi üzrə yekun hüquqi qərar qəbul edilənədək deportasiya edilməsi mümkün olmazdı.

Bu səbəbdən sözügedən məsələ emosional yanaşmalar və siyasi simpatiyalar əsasında deyil, qüvvədə olan hüquqi normalar və prosedurlar çərçivəsində dəyərləndirilməlidir”, - Əlövsət Əliyev bildirib.

Qeyd edək ki, Türkiyədə saxlanılan Milli Şuranın üzvü, sabiq deputat Gültəkin Hacıbəyli bu gün səhər saatlarında Azərbaycana deport edilib. O, Türkiyədə 2 illik oturum izni olduğunu bildirərək, deportunun qanunsuz olduğunu iddia etmişdi.