Psixoloqdan niyə qorxuruq? — Cəmiyyətin bilməli olduğu HƏQİQƏT

CƏMİYYƏT

536

13.04.2026, 19:30

Müasir cəmiyyətdə texnologiya sürətlə inkişaf etsə də, insanların daxili dünyası çox zaman diqqətdən kənarda qalır. Fiziki sağlamlıqla bağlı problemlər açıq şəkildə müzakirə olunduğu halda, psixoloji çətinliklər hələ də gizlədilir. Bir çox insan üçün psixoloqa müraciət etmək “ayıb” sayılır və ya "zəiflik" kimi görünür

Bu yanaşma isə cəmiyyətin ən təhlükəli stereotiplərindən biridir.

Uzun illər formalaşmış düşüncə tərzi insanlara öyrədib ki, problemlərini özləri həll etməlidirlər. “Psixoloqa yalnız ciddi problemi olanlar gedir” kimi yanlış fikirlər insanların yardım almaqdan çəkinməsinə səbəb olur. Halbuki psixoloji dəstək yalnız böhran anlarında deyil, gündəlik həyat keyfiyyətini artırmaq üçün də vacibdir.

İnsanlar yaşadıqları stressi, qorxuları və emosional yükləri bölüşmədikcə bu hisslər zamanla daha da ağırlaşır. Bu isə depressiya, təşviş pozuntuları, aqressiya və sosial münasibətlərdə problemlərə gətirib çıxarır.

Ən narahatedici məqam isə odur ki, bir çox insan problemin fərqinə vardıqda artıq gec olur.

Oxu24.com- a danışan klinik psixoloq Aida Sübhan bu mövzu ətrafında vacib iki məqama toxunaraq bildirir ki, cəmiyyətdə insanların psixoloqa müraciət etməkdən çəkinməsinin arxasında bir neçə ciddi və bir-biri ilə əlaqəli səbəb dayanır.

"Bunların başında isə məxfiliklə bağlı narahatlıq gəlir. Bir çox insan şəxsi həyatına dair ən həssas məqamları paylaşarkən bu məlumatların qorunub-qorunmayacağına əmin olmur. Onlar düşünür ki, deyilən sözlər hansısa formada yayılacaq və ya üçüncü şəxslərə ötürüləcək. Halbuki peşəkar psixoloqlar etik kodeksə əsasən məxfiliyi qorumağa borcludurlar. Lakin bu qaydaların cəmiyyətə kifayət qədər izah olunmaması güvənsizlik yaradır.

Digər mühüm məsələ isə özünü ifadə çətinliyidir. Bəzi insanlar hisslərini açıq şəkildə dilə gətirməyə öyrəşməyib. Daxili narahatlıqlarını sözə çevirmək onlar üçün çətin və hətta qorxulu görünür. Bu səbəbdən “psixoloqa gedib nə danışacağam?” sualı yaranır. Əslində isə psixoloji yardım prosesi məhz bu nöqtədən başlayır — mütəxəssis insanın özünü ifadə etməsinə kömək edir, ona uyğun suallar verir və danışmaq üçün təhlükəsiz mühit yaradır."-deyərək psixoloq bildirib.

Psixoloqa getmək – cəsarət göstəricisidir.

Cəmiyyətdə formalaşmış yanlış fikrin əksinə olaraq, psixoloqa müraciət etmək zəiflik deyil. Bu, insanın özünü tanımaq, problemlərini qəbul etmək və onları həll etmək istəməsinin göstəricisidir. Yəni bu addım əslində sizin nə qədər güclü olduğunuzu göstərir.

Son illərdə xüsusilə gənclər arasında psixoloji maarifləndirmə artmağa başlayıb. Sosial şəbəkələr, fərdi inkişaf mövzuları və açıq müzakirələr bu sahədə müəyyən dəyişikliklər yaradır. Artıq insanlar “nə düşünərlər?” sualından daha çox “mən necə yaxşı ola bilərəm?” sualını verməyə başlayır.

Psixoloji sağlamlıq cəmiyyətin ümumi rifahının əsas sütunlarından biridir. Bu mövzunu tabu kimi saxlamaq problemləri həll etmir, əksinə onları daha da dərinləşdirir.

Bəlkə də artıq düşüncə tərzimizi dəyişməyin vaxtıdır.

Hazırladı: Aysel

Həmçinin oxuyun