Hər qızdırmanın səbəbi infeksiyadır? – Həkimdən XƏBƏRDARLIQ

TİBB

285

09.09.2026, 17:05

Xəbərlərimizi Google-da izləyin

Yeniliklərdən dərhal xəbərdar olun

Gündəlik həyatda demək olar ki, hər kəs bədən hərarətinin yüksəlməsi problemi ilə qarşılaşır. Çox zaman qızdırma yüksələn kimi dərhal müxtəlif dərmanlara və ya antibiotiklərə əl atmaq adəti yaygındır. Lakin mütəxəssislər bu cür birtərəfli yanaşmanın və özbaşına müalicənin yolverilməz olduğunu bildirirlər. Bəs hərarətin artması hər zaman infeksiya əlamətidirmi? Qızdırma zamanı necə düzgün davranmaq lazımdır?

Mövzu ilə bağlı suallarımızı həkim-infeksionist Dr. Zəba Hüseynova cavablandırıb.

"Hər qızdırmanın arxasında infeksiya dayanmır"

Həkim-infeksionist Dr. Zəba Hüseynova bildirir ki, bədən hərarətinin qalxması hər zaman infeksiya demək deyil:

“Qızdırma özlüyündə xəstəlik deyil, orqanizmin immun sisteminin müxtəlif vəziyyətlərə verdiyi reaksiyadır və bir simptomdur. Bəzi iltihabi və autoimmun xəstəliklər, revmatik problemlər, allergik reaksiyalar, eləcə də onkoloji xəstəliklər və digər qeyri-infeksion hallar zamanı da qızdırma yarana bilər. Əgər temperatur yüksəlibsə, dərhal "infeksiya var" düşüncəsi ilə antibiotikə başlamaq tamamilə yanlış yanaşmadır”.

Dəqiq səbəb necə müəyyən edilməlidir?

Dr. Zəba Hüseynova qeyd edir ki, hər hansı bir müalicəyə başlamazdan əvvəl vəziyyəti hərtərəfli qiymətləndirmək lazımdır:

•Başqa hansı simptomların olması araşdırılmalıdır (məsələn, qızdırmanın neçə gün davam etməsi).

•Müayinə zamanı digər əlamətlərin mövcudluğu nəzərə alınmalıdır.

•Qan analizi və digər zəruri laborator-instrumental müayinələrdə nəticələrin nə göstərdiyi incələnməlidir.

“Unutmayın ki, qızdırma birbaşa diaqnoz deyil, sadəcə xəbərdedici bir simptomdur. Sağlamlığınızı riskə atmamaq üçün həkim müayinəsindən keçmədən hər hansı dərman preparatından istifadə etməyin”,- deyə həkim qeyd edib.

Jalə

Həmçinin oxuyun