Gələn il maaş və pensiyalar nə qədər artacaq? - AÇIQLAMA

Gələn il əmək haqqlarının, pensiyaların, sosial müavinətlərin artırılması nəzərdə tutulur. Artımların 40 faiz və daha çox olacağı gözlənilir və sahələrdən asılı olaraq bu rəqəmlər dəyişə də bilər. Bu artımlar iki milyondan artıq vətəndaşı əhatə edəcək. Oxu24.com xəbər verir ki, bunu "Trend"ə Milli Məclisin deputatı Vüqar Bayramov bildirib. Millət vəkilinin sözlərinə görə, gələn ilin dövlət büdcəsinin 46 faizdən çoxu sosial yönümlü olacaq: "Prezident İlham Əliyevin imzaladığı "Əhalinin sosial rifahının qorunması sahəsində əlavə tədbirlər haqqında" Sərəncam sosial yönümlü xərclərin artırılmasına imkan verir. Yəni, milyardla ifadə olunan vəsaitin bu istiqamətdə yönəldilməsi nəzərdə tutulur. 2022-ci ilin dövlət büdcəsi artıq Milli Məclisdə təsdiq olunub. Büdcə xərclərinin 46.4 faizi sosial istiqamətə yönəldiləcək. Bu, müstəqillik illərində sosial xərclərin büdcə xərclərində ən böyük payıdır. Yəni bu o deməkdir ki, növbəti il hər 100 manatdan 46.4 manatı sosial məqsəd üçün istifadə olunacaq. Bu ondan xəbər verir ki, 2022-ci ildə tətbiq olunacaq sosial paket kifayət qədər əhatəli olacaq və kifayət qədər çox vətəndaşımızın həm birbaşa, həm də dolayı olaraq bu artımlardan faydalanmasına gətirib çıxaracaq".