Azərbaycan Ordusunun 44 günlük Vətən Müharibəsində yazdığı qəhrəmanlıq dastanının iştirakçılarından və şəhidlik zirvəsinə nə ucalan hərbçilərindən biri də gizir Quliyev Şəhriyar Nəsib oğludur.

Bu gün onun doğum günüdür.

Oxu24.com  xəbər verir ki, Azərbaycan ərazilərinin işğaldan azad edilməsində böyük pay sahibi olan qəhrəman Qubadlı rayonu istiqamətində gedən döyüşlərdə şəhid olub.

Quliyev Şəhriyar Nəsib oğlu 25 may 1990-cı ildə Ağdam şəhərində anadan olsa da, sonrada ailəsi ilə birlikdə Sumqayıt şəhərinə köçüb. Uşaqlıqdan idmana maraq göstərən Şəhriyar Xüsusi Təyinatlı Qüvvələrdə kəşfiyyatçı giziri olub. Quliyev MMA – qaydasız döyüşlə məşğul olub, Gürcüstanda və Türkiyədə xüsusi döyüş təlimləri keçib.

Şəhriyar 2016-cı il aprel döyüşlərində də iştirak edib. 2020-ci il sentyabrın 27-də başlayan Vətən müharibəsində yenidən döyüşə atılan igid Füzuli, Xocavənd, Cəbrayıl, Hadrut rayonlarında 27 gün qəhrəmancasına döyüşüb.

Cəldliyinə, çevikliyinə və qorxmazlığına görə döyüş yoldaşları onu "Boz Qurd" adlandırıb. 150-dək erməni əsgər və zabitini məhv etdiyi bildirilirdi.

Sonuncu dəfə oktyabrın 23-də Qubadlı istiqamətində gedən döyüşdə xüsusi tapşırığı yerinə yetirərkən düşmən sayca 3 dəfə çox olub və xüsusi muzdlulardan istifadə edib. Şəhriyar rəşadətlə döyüşüb və iki döyüş yoldaşını döyüş meydanından yaralı çıxarıb. Yenidən döyüş meydanına qayıdan zaman qəhrəmancasına şəhid olub.

Azərbaycan Prezidenti İlham Əliyevin müvafiq sərəncamlarına əsasən, şəhid Şəhriyar Quliyev "Qarabağ" ordeni, "Vətən uğrunda" medalı, "Cəbrayılın azad olunmasına görə" medalı, "Füzulinin azad olunmasına görə" medalı və "Xocavəndin azad olunmasına görə" medalı ilə təltif olunub.

Hazırladı: Miri Məcidli