Ürəyə maye toplanması- Səbəblər müxtəlifdir…
Əhali arasında ürəyə su yığılması deyilən bir problem haqda çoxları eşidib. Bu, təkcə ürəyin problemi kimi deyil, həm də bir çox xəstəliklərin ağırlaşmaları zamanı ortyaya çıxan hal olaraq qəbul edilir.

İnvaziv kardioloq Gülanə Ağayeva OXU24.COM-a tibbi dildə perikardial effuziya (ürək ətrafı kisəyə maye toplanması) adlandırılan problem, onun səbəbləri və müalicəsi barədə yazıb:

Normalda ürəyin ətrafını çevrələyən perikard adlanan kisədə 50 ml-ə qədər maye olur ki, bu maye ürəyin kisə içərisində normal hərəkətini təmin edir.
Perikardial kisədə mayenin artması isə perikardial zarın özünün iltihabi ve ya orqanizmdə olan hər hansı bir xəstəliyin nəticəsi olaraq ortaya cıxır. Əlamətləri toplanan mayenin miqdarından ve toplanma sürətindən asılıdır. Perikardial kisəyə maye toplanması ürəyin özünün boşluqlarına təzyiq edərək ürəyin qanla dolumunu çətinləşdirir ve bu da xəstədə ciddi təngnəfəsliyə, boğulma şikayətlərinə ve xəstənin məcburi oturaq vəziyyət almasına səbəb olur.
Perikarda toplanan mayenin miqdarından ve xəstədə yaratdığı simptomatikadan asılı olaraq hər xəstə üçün individual müalicə üsulu seçilir.
Dərman müalicəsinə tabe olmayan, davamlı artan və ürək boşluqlarına təsir göstərən maye toplanması hallarında isə ürək kisəsi punksiya edilərək toplanmış maye boşaldılır və həmin mayedən analiz təhlili aparılaraq toplanma səbəbi araşdırılır.

Səbəblər müxtəlifdir:
Orqanizmdə olan hər hansı bir bədxassəli törəmə,
Vərəm,
Qalxanabənzər vəzin ciddidisfunksiyası,
İltihabi xəstəliklər,
Sistem xəstəlikləri və s.