Azərbaycanda pandemiya ilə bağlı məhdudiyyətlər artıq aradan qaldırılmağa başlayıb. Bunlara qonşu ölkələrlə nəqliyyat əlaqələrinin bərpası da daxildir. Artıq bəzi beynəlxalq uçuşların həyata keçirilməsinə də icazə verilib. Fevral ayının ortalarından etibarən Rusiyaya uçuşların bərpa edilməsi ilə
bağlı qərar verilib.

Sərnişin qatarlarının hərəkətinə isə hələlik icazə verilməyib. Nisbətən ucuz olduğu üçün sərnişin qatarından daha çox istifadə edildiyini nəzərə alsaq, bu məsələ gündəmdədir və Rusiyaya tez-tez səfər edən, orada yaşayan və bizneslə məşğul olan vətəndaşların sosial şəbəkələrdə əsas müzakirə mövzularından biridir. Miqrasiya eksperti Azər Allahverənov “MediaPost”a bildirib ki, aviareyslərın açılmasına qərar verilsə də kütləvi sərnişindaşımalar üçün avtomobil nəqliyyatı və sərnişin qatarlarının hərəkətinin bərpa edilməsi çox vacibdir.

Məsələ ilə bağlı “MediaPost”un sorğusuna cavab olaraq “Azərbaycan Dəmir Yolları” Qapalı Səhmdar Cəmiyyətindən bildirilib ki, Rusiyaya və digər istəqamət üzrə sərnişin qatarlarının yenidən bərpası Operativ Qərargahın verəcəyi qərardan asılıdır.