"2019 və 2020-ci ilin 7 ayı ərzində 647 meşə gözətçisi işdən çıxarılıb. Onların əvəzinə yeniləri təyin olunub. Bununla bağlı çox ciddi iş aparılır".

Publika.az xəbər verir ki, bunu Ekologiya və Təbii Sərvətlər Nazirliyinin rəsmi "Facebook" səhifəsində "Ekspert saatı" verilişdə Dövlət Ekoloji Təhlükəsizlik Xidmətinin rəisi Hikmət Əlizadə deyib.

O bildirib ki, araşdırma zamanı məlum olub ki, meşədə ağacların qırılmasında bəzən öz gözətçilərimiz də digər şəxslərlə əlbir olublar. Yaxud da onların səriştəsizliyi səbəbindən bu cür hallar baş verir:

"Ölkədə il ərzində 64 min kubmetr odun tədarükünə ehtiyacı var. Burada söhbət Təhsil Nazirliyinin, Dövlət Sərhəd Xidmətinin və ucqar regionlarda yaşayan əhalinin tədarükündən gedir. Azərbaycan bu sahədə çox böyük irəli addım atıb. Artıq ölkəmizin 96 %-ı qazlaşdırılıb. Bununla belə digər qazlaşmayan ucqar kəndlərin, dediyimiz müvafiq qurumların təchizatı üçün odun tədarükü vacibdir. Bu prosesdə həm odun, həm də içlik materiallar əldə edilir. Onların da bir sıra müəssisələrə satışı həyata keçirilir".