Bu gün XTQ qulluqçusu Cəlilov  Sahil Oktay oğlunun doğum günüdür.

Oxu24.com xatırladır ki,Sahil Cəlilov 17 may 1998-ci ildə Şərur rayonunun Dərvişlər kəndində anadan olub.

Hərbçi olmaq şərəflidir, hərbçi olmaq xalqın qüruru olmaq deməkdir. Sinəsində qəhrəman oğullar böyüdən Şərur rayonunda da hərb sahəsini seçən, bu adı şərəflə daşıyan, iftixarı bilən oğullar çoxdur. Bu gün o igid, cəsur, qorxmaz oğullardan biri Dərvişlər kəndinin qəhrəman oğlu Cəlilovlar ailəsinin son beşiyi Cəlilov Sahil Oktay oğlundan söz açacağıq.

2018-ci ildə hərbi xidmətini başa vurduqdan sonra Sahil 2019-cu ildə Əlahiddə Ümumqoşun Ordunun xüsusi təyinatlısı, kəşviyyatçısı kimi xidmətə başlayır. Hərbçi kimi cəmi bircə il çalışsa da, dəfələrlə fəxri fərmanlara layiq görülür. Sahil hər bir təlimdən üzüağ, alnıaçıq çıxır. Elə vətən müharibəsində də…

Oktyabrın 19-da Füzuli istiqamətində döyüşlərə başlayan Sahil böyük şücaət göstərərək düşmənin canlı qüvvəsini, texnikasını məhv edir. Kəşfiyyatçı kimi Qarabağ torpağı uğrunda gedən döyüşlərdə qəhrəmanlıq göstərir. Oktyabrın 22-də Xocavənd istiqamətindəki yüksəkliyi almaq uğrunda apardığı mübarizədə snayper hədəfinə tuş gələrək şəhidlik məqamına ucalır.

Vaxtilə, “ölüm bizə nə yaxındır, nə uzaq. Biz ölümün özüyük… Bir gün Vətən uğrunda şəhid olsaq, bu bizim üçün ən böyük şərəfdir”,- deyə yazan 23 yaşlı Sahil adının mənasını, şəhidliyi həyatının şüarı seçdi. Vətən sevgisi sahilinə sığmayan bir dəniz oldu.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Sahil Cəlilov ölümündən sonra "Vətən uğrunda" medalı ilə təltif edilib.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Sahil Cəlilov ölümündən sonra "Şuşanın azad olunmasına görə" medalı ilə təltif ediib.

Azərbaycan ərazilərinin işğaldan azad olunması zamanı döyüş tapşırıqlarını və xidməti vəzifələrini yerinə yetirən zaman fərqləndiyinə görə Azərbaycan Prezidenti İlham Əliyevin 30.12.2020-ci il tarixli Sərəncamına əsasən Sahil Cəlilov ölümündən sonra "Hərbi xidmətlərə görə" medalı ilə təltif edilib.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Sahil Cəlilov ölümündən sonra "Füzulinin azad olunmasına görə" medalı ilə təltif edilib.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Sahil Cəlilov ​ölümündən sonra "Xocavəndin azad olunmasına görə" medalı ilə təltif edilib.

Hazırladı: Miri Məcidli