Xəbər verdiyimiz kimi, bu gün “SOY” prodakşının rəhbəri Oqtay Əliyev ağır yol qəzasında həyatını itirib.

Bəs O. Əliyev kimdir?

Oxu24.com  əməkdar mədəniyyət işçisi haqqında məlumatları təqdim edir:

Ə. Əliyev 19 iyun 1968-ci ildə İrəvanda anadan olub. Xalq artistləri Vidadi Əliyevin və Elmira İsmayılovanın övladıdır. Sənətşünaslıq üzrə fəlsəfə doktoru, aparıcı Elçin Əlibəylinin isə qardaşıdır.

O. Əliyev 1975-1985-ci illər İrəvan şəhəri M.F. Axundov adına orta məktəbi bitirib. 1987-1992-ci illər Azərbaycan Dövlət İncəsənət İnstitutunun “kino və dram rejissoru” fakultəsində təhsil alıb.

1983-1985-ci ildə Cəfər Cabbarlı adına İrəvan Dövlət Azərbaycan Dram Teatrında rejissor köməkçisi işləyib. 1989-1994-cü illərdə Bakı şəhər Mədəniyyət idarəsində rejissor vəzifəsində çalışıb. 1993-cü ildə Azərbaycan televiziyasında “Virtuoz” adlı layihənin prodüseri olub.

1990-cı ildə "Ər və arvad" (Mar Bayciyev), "Molla Nəsirəddin və Əzrayıl", "Gəlin, açıq danışaq, lap açıq", "Əkizlərin nağılı" (Panço Pançiyev) pyeslərinin və bir sıra əlamətdar bayramların quruluşçu rejissoru olmuş, ssenarilərini yazıb. 1995-ci ildə A.P. Çexovun "Məmurun ölümü" əsəri əsasında çəkilmiş "Kiçik leytenant" filminin baş prodüseri olub. 1997-ci ildə Space TV-də yayımlanan "Korifey", "Həftə çal-çağırı", "İşdən sonra" verlişlərinin müəllifi və baş prodüseri olub.

1998-ci il oktyabr ayının 5-də "SOY" prodakşın şirkətinin təsisçisi və prezidenti olub. 

O. Əliyev Əməkdar artist Dilarə Əliyeva ilə ailə qurub. Onların Aytən və Banu adlı iki qızı var.

O, bu gün  54 yaşında yol qəzasında həlak olub. O. Əliyevin idarə etdiyi “Lexus Lx470” markalı avtomobil yolun hərəkət hissəsindən çıxaraq aşıb. Qəza nəticəsində Oqtay Əliyev dünyasını dəyişmiş, avtomobildə olan Xalq artisti Mehriban Zəki və əməkdar D. Əliyeva yüngül xəsarətlər almışdır.