"Qaçqınkom"un tikdiyi binalar necə satılacaq? - Hər şey aydın oldu

Azərbaycanın Baş naziri Əli Əsədov “Əmək və Əhalinin Sosial Müdafiəsi Nazirliyi tərəfindən mənzillərin hərrac vasitəsilə satışı Qaydası”nı təsdiq edib. Yeni sənəd inşası başa çatmış və hazırda tikintisi davam edən mənzillərin açıq auksion formasında keçirilən hərrac vasitəsilə satışı qaydasını müəyyən edir. 

Binalar Qaçqınların və Məcburi Köçkünlərin İşləri üzrə Dövlət Komitəsinin sifarişi ilə Bakı şəhəri Sabunçu rayonunun Ramana qəsəbəsində, Qaradağ rayonunun Ümid qəsəbəsində, Binəqədi rayonunun Xocasən qəsəbəsində, Abşeron, Lənkəran və Samux rayonlarında inşa edilib. Tikintisi davam edən binalar isə Bakı şəhəri Sabunçu rayonunun Kürdəxanı qəsəbəsində və Abşeron rayonunda yerləşir. 

Mənzillərin satış qaydaları haqqında məlumat Əmək və Əhalinin Sosial Müdafiəsi Nazirliyinin rəsmi internet saytında yerləşdiriləcək.

Şəxsin müraciəti qeydə alınarsa, mənzilin qiymətinin 5%-i dəyərində ilkin ödəniş olunur ki, bu da mənzil alınan zaman onun ümumi dəyərindən çıxılır. Bəs eyni mənzil üçün 2 və daha artıq şəxs ilkin ödəniş edərsə, proses necə tənzimlənir?

Prosesin gedişində vətəndaş mənzili almaqdan imtina edərsə, hərracın keçirilməsinə ən azı 3 gün qalmış elektron qaydada imtina ilə bağlı müraciət etməlidir. Əks halda ödədiyi beh geri qaytarılmayacaq. Təşkilatçı hərracın nəticələri haqqında məlumatı hərracın keçirildiyi gündən 15 iş günü müddətində mediada dərc etdirməli və özünün rəsmi internet səhifəsinə yerləşdirməlidir.