Suqovuşanda ağır yaralandı, qazi atasına “yıxılmışam” dedi

Vətən onu sevən, onu qoruyan, onun uğrunda qəhrəmanlıqlar göstərən igidləri ilə tamdır, bütövdür. O igidlərdən biri də Nicat Fətulla oğlu İsmayılovdur. 

Cəmi 19  yaşı var onun. Amma bu 19  illik ömründə həyatının ən şərəfli tarixini yaşayıb: “2019-cu ilin oktyabr ayında hərbi xidmətə getmişəm. Hərbi xidmətdə olduğum müddətdə döyüş başladı. Döyüşlərin başlanması bizim üçün qürur hissi yaşatdı, çünki döyüşlərə qatılmaq bizə nəsib oldu. Talış kəndi uğrunda gedən döyüşlərin iştirakçısıyam. Suqovuşanda yaralanmışam. Sol bağırsaq nahiyəsindən qəlpə yarası almışam. Belimdən isə odlu silahdan açılan atəş nəticəsində yaralanmışam. Onurğamda çat var. Ayaqlarımın hər ikisi işləmir”.

19 yaşlı döyüşçümüz ailəsinə bu xəbəri özü verib, amma “yıxılmışam, ayağım əzilib” deyib: “Ayın 3-ü Talış kəndini azad etdik. Suqovuşan istiqamətinə yollandıq. Komandanlıq “Dur” əmri verdi.  Saat 3-ün yarısı olardı düşmən tərəfi hücuma keçdi. İlk atəş minomyotlardan açıldı. 10 nəfər döyüşçü yoldaşımla yaralandıq. Ondan sonra olanlar yadımda deyil. Oyandım ki, Naftalan Mərkəzi Klinik Xəstəxanasındayam”. 

Naftalanda yaralı döyüşçümüzə ilkin yardım göstərildikdən sonra o, Gəncə şəhər Mərkəzi Xəstəxanasına gətirilib və belindən əməliyyat olunub: “Həkimlərimiz yenidən əməliyyat olunacağımı deyirlər, fevral və yaxud mart ayında. Əgər hər şey yolunda getsə, ayaqlarımın da hissiyyatı 6 ay və yaxud 1 ildən sonra bərpa oluna bilər”. 

19 yaşlı qəhrəmanımızın arzularına gəlincə, “Arzum ilk Şuşaya getməkdir. İnşallah, yaxşı olan kimi Şuşaya, ordan da Laçına qalxacam. İnanın, bir az yaxşılaşsam, yenidən gedərəm”. 

Nicat ailənin tək oğul övladıdır. Atası Fətulla İsmayılov da Birinci Qarabağ Müharibəsinin iştirakçısıdır, ikinci qrup əlildir: “1992-93-cü illərdə Ağdərə-Kəlbəcər istiqamətindəki döyüşlərdə yaralanmışam. İndi özümdən çox oğlumla qürur duyuram. İgidlik göstərib. Qulluq etdiyi hərbi hissədə hörməti var. Hərbi xidməti zamanı fərqləndiyinə görə təşəkkürlə təltif olunub. Yaralandığını da gec bilmişəm. Evə deməyib. Gəncə hospitalında özünə gələndən sonra zəng etdi və dedi ki, yıxılmışam, qıçım azca sıyrılıb”. 

Yaşa, var ol, Azərbaycan Əsgəri! Tezliklə işğaldan azad olunan torpaqlarımızda görüşənədək!