Aylarla yerə enmədən yaşayan quş – Əbabilin heyrətamiz həyatı

MARAQLI

507

01.04.2026, 21:14

Təbiətin ən maraqlı canlılarından biri olan Əbabil quşu sanki göy üzü üçün yaradılıb. Bu qeyri-adi quş həyatının böyük hissəsini havada keçirir və yerə demək olar ki, yalnız zəruri hallarda enir.

Araşdırmalar göstərir ki, bəzi əbabil növləri 10 aya qədər fasiləsiz uçuş edə bilir. Bu müddət ərzində onlar havada qidalanır, su ehtiyacını qarşılayır, hətta qısa “mikroyuxu”larla dincəlirlər. Bu saniyəlik mürgüləmələr quşun enerjisini qorumasına və uzun məsafələr qət etməsinə imkan yaradır.

Əbabilin bədən quruluşu da bu həyat tərzinə tam uyğunlaşıb. Uzun və incə qanadları ona yüksək sürətlə uçmağa şərait yaradır. Lakin bu xüsusiyyət yerə enib qalxmağı çətinləşdirir. Məhz buna görə də yuvalarını yüksək qayalıqlarda, tikililərin damlarında və əlçatmaz yerlərdə qururlar.

Bu quşlar həm də uzun məsafəli köçləri ilə tanınır. Onlar Afrika ilə Asiya arasında təxminən 10 min kilometrlik məsafəni demək olar ki, fasiləsiz qət edə bilirlər. Yaz və yay aylarında isə Azərbaycan səmasında da tez-tez müşahidə olunurlar.

Əbabil eyni zamanda olduqca sürətlidir. Saatda 150–170 km-ə çatan uçuş sürəti ilə havadakı həşəratları böyük ustalıqla tutur. Bu xüsusiyyət onu göy üzünün ən çevik “ovçularından” birinə çevirir.

Onların balaları da maraqlı xüsusiyyətə malikdir. Qida azaldıqda və ya hava soyuduqda bədən temperaturlarını aşağı salaraq “torpor” adlanan vəziyyətə keçir, bu isə enerjiyə qənaət etməyə və sağ qalmağa kömək edir.

Bütün bu xüsusiyyətlər Əbabil quşunu təbiətin ən unikal canlılarından birinə çevirir – sanki onun evi yer yox, məhz səmadır.

Nigar

Həmçinin oxuyun