“Qarabağ” İsveç klublarına qarşı uğurlu statistikaya malikdir

Qarabağ” UEFA Avropa Liqasının əsas mərhələsinin VI turunda bu gün İsveçdə “Elfsborq”un qonağı olacaq.

Oxu24.com  xəbər verir ki, bu görüş Azərbaycan çempionunun avrokuboklarda İsveç klublarına qarşı 8-ci dueli kimi tarixə düşəcək.

Ağdam klubunun isveçlilərlə ilk matçı 2013-cü ildə Avropa Liqasının üçüncü təsnifat mərhələsində “Gefle”yə qarşı olub. Qurban Qurbanovun komandası hər iki görüşdə (1:0, 2:0) rəqibinə qalib gələrək pley-off mərhələsinə yüksəlib.

Növbəti qarşılaşma isə bundan 3 il sonraya təsadüf edib. 2016-cı ildə yenə Avropa Liqasının bu dəfə pley-off mərhələsində “Göteborq”la üz-üzə gələn “Qarabağ” səfərdəki ilk matçda 0:1 hesabı ilə uduzub. Lakin doğma meydanda rəqibini 3 cavabsız qolla üstələyən ağdamlılar inamlı qələbə ilə adını qrup mərhələsinə yazdırıb.

“Qarabağ”ın Avropa Liqasının qrup mərhələsində İsveç təmsilçiləri ilə ilk oyunu isə 2023-2024-cü illər mövsümündə reallaşıb. Komandamız "Hekken"ə səfərdə 1:0, evdə isə 2:1 hesabı ilə qalib gələrək, aktivinə 6 xal əlavə edib.

“Köhlən atlar” isveçlilərlə hələlik son matçına isə bu mövsüm çıxıb. Avropa Liqasının yeni formatda keçirilən Liqa mərhələsinin II turunda doğma meydanda “Malmö” ilə münasibətlərini aydınlaşdıran “Qarabağ” meydandan məğlub ayrılıb - 1:2.

İndiyədək ümumilikdə 7 oyunda İsveç təmsilçiləri ilə qarşılaşan “Qarabağ” 5 qələbə qazanıb, 2 dəfə isə məğlub olub. Topların nisbətində də Ağdam klubunun üstünlüyü var – 10:4.

Qeyd edək ki, dekabrın 12-dən 13-nə keçən gecə “Boras Arena”da təşkil olunacaq “Elfsborq” – “Qarabağ” oyunu Bakı vaxtı ilə saat 00:00-da start götürəcək. Aktivində 3 xalı olan Azərbaycan çempionu turnir cədvəlinin 32-ci pilləsində qərarlaşıb.