Türkiyə mediasında yayılan xəbərlərə görə, “Fənərbağça” klubunun çalışdırıcısı Joze Mourinyo “Əl Nəsr”in iki nəhəngi, Kriştiano Ronaldo və Anderson Taliscanı icarə əsasında almaq istəyir.

Oxu24.com xəbər verir ki, bir neçə mənbədə hətta oyunçularla Mourinyonun şəxsən danışıb, anlaşdığı barədə məlumatlar yer alıb.

Bundan əlavə, Kriştiano Ronaldonun sosial şəbəkədə məsələ ilə bağlı video da paylaşdığı barədə iddialar səsləndirilib:

“Yanvarda “Əl Nəsr”dən ayrılıb, Talisca ilə “Fənərbağça”ya gedirəm. Bu mübadilə olacaq, ərəblər maaşımı ödəyəcək. Məşqçim Mourinyo ilə çempion olub, mövsümün sonunda isə “Sportinq”ə qayıdacağam”.

Türkiyənin “Teyit” yerli faktyoxlama sistemi həmin videonu araşdırıb və gəlinən nəticələr belə olub:

-Kriştiano Ronaldonun belə bir açıqlaması yoxdur.

Bildirilib ki, Ronaldoya aid edilən cümlələr türk, ingilis və portuqal dillərində araşdırılıb və bu iddianı dəstəkləyən etibarlı mənbə tapılmayıb.

Bundan əlavə viral olan görüntü 14 iyul 2023-cü ildən veb şəbəkələrədə dolaşır.

Və son olaraq Ronaldo həmin videoda “Fənərbağça”dan yox, Di Marianın “Benfika”ya keçidi ilə bağlı danışır.