Hakimə etiraz etmək istəyənlərin NƏZƏRİNƏ: Bu səhvi edənlər cərimə ilə üzləşə bilər!

HÜQUQ

342

08.09.2026, 20:50

Xəbərlərimizi Google-da izləyin

Yeniliklərdən dərhal xəbərdar olun

Azərbaycan məhkəmə təcrübəsində vətəndaşların və ya vəkillərin hakimlərə etiraz etməsi proseduru tez-tez müzakirə olunan və yanlış anlaşılan mövzulardandır. Lakin təcrübə göstərir ki, bir çox insanlar qanundakı "etiraz" anlayışını gündəlik həyatdakı mənalarla səhv salırlar. Hakimin vəsatəti təmin etməməsi və ya proses zamanı tərəflərin sözünü kəsməsi heç də avtomatik olaraq hakimə etiraz üçün qanuni əsas sayılmır. Əksinə, prosesi uzatmaq məqsədi ilə irəli sürülən əsassız və uydurma iddialar tərəfin özünün cərimələnməsi ilə nəticələnə bilər. Məhz buna görə də məhkəmə prosesi iştirakçılarının qanuni hüquqlarını və real etiraz əsaslarını dəqiq bilməsi böyük əhəmiyyət daşıyır.

Mövzu ilə bağlı ətraflı məlumatı Oxu24.com-a hüquqşünas Adilə Paşayeva təqdim edib. Hüquqşünas mülki prosessual qanunvericiliyə istinad edərək əsas məqamları sadə dildə izah edib:

”Tərəflərin tez-tez yol verdiyi əsas səhvlərdən biri hakimin hər hansı vəsatəti təmin etməməsini və ya sözü kəsərək növbəni gözləməyi bildirməsini etiraz üçün əsas hesab etməsidir; lakin qanunvericiliyə görə bunların heç biri hakimin hərəkətinə etiraz üçün əsas deyil”.

Onun sözlərinə görə, hakim qanunvericiliyə uyğun təyin edilməyibsə, işdə tərəflərin və ya onların nümayəndələrinin qohumudursa, həmin işə əvvəllər ekspert, katib, tərcüməçi, şahid qismində baxıbsa və ya işin nəticəsində maraqlı olub qərəzsizliyinə şübhə doğuran kifayət qədər əsas varsa, bu, qanuni etiraz əsası hesab olunur.

Hüquqşünas qeyd edib ki, əgər etiraz məhkəmə prosesini ləngitmək məqsədilə verilibsə və ya gətirilən dəlillər uydurmadırsa, etirazı verən tərəf cərimə oluna bilər. Buna görə də mütəxəssis vətəndaşları məsələyə emosiya ilə deyil, məhz qanuni əsaslarla yanaşmağa çağırır.

Çimnaz Telmanqızı

Həmçinin oxuyun