Vəkil alimentlə bağlı valideynlərin bilməli olduğu hüquqları açıqladı  

Boşanma prosesindən sonra alimentin hansı qaydada ödənilməsi valideynlər arasında ən çox müzakirə olunan məsələlərdən biridir. Xüsusilə bəzi valideynlər alimentin birbaşa digər valideynə deyil, uşağın adına açılmış bank hesabına köçürülməsini istəyirlər. Məqsəd isə vəsaitin gələcəkdə uşağın təhsili və digər ehtiyacları üçün qorunub saxlanılmasıdır.

Mövzu ilə bağlı Oxu24.com-a danışan vəkil Elvin Səfərov bildirib ki, qanunvericilik aliment vəsaitinin istifadəsi ilə bağlı müəyyən imkanlar nəzərdə tutur və bəzi hallarda məhkəmə bu istiqamətdə qərar qəbul edə bilər.

Vəkilin sözlərinə görə, alimentin əsas məqsədi uşağın gündəlik yaşayışının, qidalanmasının, təhsilinin, müalicəsinin və digər zəruri ehtiyaclarının qarşılanmasıdır. Buna görə də aliment tam şəkildə istifadə olunmadan yalnız gələcək üçün saxlanılması hər zaman qanunun məqsədinə uyğun hesab edilmir.

“Valideyn aliment ödəyərkən hesab edirsə ki, ödənilən vəsait tam şəkildə uşağın mənafeyinə xərclənmir və ya onun istifadəsi ilə bağlı narahatlıqları var, bu halda qanun müəyyən hüquqi imkanlar tanıyır. Belə hallarda alimentin bir hissəsinin uşağın adına açılmış bank hesabına köçürülməsi ilə bağlı məhkəməyə müraciət etmək mümkündür”, – deyə Elvin Səfərov bildirib.

Vəkil qeyd edib ki, məhkəmə konkret iş üzrə bütün halları araşdırdıqdan sonra alimentin müəyyən hissəsinin uşağın adına açılmış hesaba köçürülməsi barədə qərar verə bilər.

“Qanunvericilik belə bir yanaşmaya imkan verir ki, alimentin müəyyən hissəsi uşağın cari ehtiyacları üçün istifadə olunsun, digər hissəsi isə onun gələcəyi üçün bank hesabında toplansın. Praktikada məhkəmə aliment məbləğinin 50 faizədək hissəsinin uşağın adına açılmış hesaba köçürülməsinə qərar verə bilər. Qalan hissə isə uşağın gündəlik ehtiyaclarının ödənilməsi üçün istifadə edilir”, – deyə hüquqşünas bildirib.

Onun sözlərinə görə, məsələn, aylıq aliment məbləği 200 manat müəyyən olunubsa, məhkəmə şəraitdən asılı olaraq həmin vəsaitin 100 manatının uşağın adına açılmış hesaba köçürülməsini, digər 100 manatının isə uşağın saxlanılması üçün istifadə edilməsini nəzərdə tuta bilər.

Elvin Səfərov vurğulayıb ki, belə qərar avtomatik tətbiq edilmir və yalnız valideynin müraciəti əsasında məhkəmə tərəfindən bütün sübutlar araşdırıldıqdan sonra qəbul olunur.

“Məhkəmə ilk növbədə uşağın maraqlarını əsas götürür. Əgər müəyyən olunarsa ki, alimentin bir hissəsinin hesabda toplanması uşağın gələcək mənafeyinə xidmət edir və onun hazırkı ehtiyaclarını məhdudlaşdırmır, belə bir qərarın qəbul edilməsi mümkündür”, – deyə vəkil qeyd edib.

Hüquqşünas əlavə edib ki, uşağın adına açılmış hesabda toplanan vəsait də uşağın mülkiyyəti hesab olunur və həmin pulların istifadəsi qanunvericiliyin tələblərinə uyğun həyata keçirilir.

Elvin Səfərovun sözlərinə görə, aliment ödəyən valideyn yalnız şəxsi narazılıq əsasında vəsaiti birtərəfli qaydada uşağın hesabına köçürə bilməz. Bunun üçün mütləq məhkəmə qərarı və ya tərəflər arasında qarşılıqlı razılaşma olmalıdır.

Vəkil sonda valideynlərə tövsiyə edib ki, alimentlə bağlı yaranan fikir ayrılıqlarını mübahisəyə çevirmək əvəzinə hüquqi mexanizmlərdən istifadə etsinlər. Onun sözlərinə görə, alimentin ödənilməsi və istifadəsi ilə bağlı bütün qərarlarda əsas meyar uşağın maraqları və rifahı olmalıdır.

Həmçinin oxuyun

İlham Əliyev cüdo üzrə dünya çempionatının açılış mərasimini izləyib - YENİLƏNİB-2

Cəriməni vaxtında ödəməyən sürücünü nə gözləyir? – Ekspertdən xəbərdarlıq  

Avtomobil alarkən ən çox edilən səhv nədir? – Mütəxəssisdən sürücülərə xəbərdarlıq  

Sükan arxasında siqaret çəkməyin cəzası varmı? – Hüquqşünasdan AÇIQLAMA