Azərbaycanda bu yaşdan sonra sürücülük vəsiqəsi verilməyəcək? — Hüquqşünas DETALLARI AÇIQLADI

AKTUAL

93207

16.06.2026, 07:48

Sürücülük vəsiqəsini yeniləmək üçün yaş məhdudiyyəti varmı? — HÜQUQİ İZAH

Nəqliyyat vasitələrinin idarə edilməsi və sürücülük hüququnun rəsmiləşdirilməsi məsələləri Azərbaycan qanunvericiliyində konkret normativ aktlarla tənzimlənir. Müəyyən bir yaş həddinə çatmış, xüsusilə ahıl və yaşlı kateqoriyadan olan sürücülərin vəsiqə müddəti bitdikdə, onların bu sənədi yenidən əldə edib-edə bilməyəcəyi, qanunvericilikdə yuxarı yaş həddinin mövcud olub-olmaması həm sürücülər, həm də onların yaxınları tərəfindən tez-tez verilən və cəmiyyətdə maraq doğuran suallardan biridir. Təcrübədə bir çox vətəndaşlar elə hesab edirlər ki, müəyyən bir yaşdan sonra sükan arxasına keçməyə hüquqi qadağa qoyulur və ya proses çətinləşir.

Oxu: SON DƏQİQƏ! Bu bankda maaş kartlarından pul tutulmasına başlanıldı

Bu cür hallara aydınlıq gətirmək, ümumiyyətlə qanunun bu barədə mövqeyini dəqiq öyrənmək məqsədilə Oxu24.com mövzuya işıq salıb.

Məsələnin hüquqi tərəflərini, qanunun tələblərini və tətbiq edilən əsas meyarları aydınlaşdırmaq üçün hüquqşünas Əkrəm Həsənov Oxu24.com-a danışıb.

Qanunda yaş məhdudiyyəti varmı?

Hüquqşünas Əkrəm Həsənov bildirib ki, sürücülük vəsiqəsinin istər ilk dəfə alınması, istərsə də müddətinin uzadılması prosesində vətəndaşlar üçün hər hansı bir yuxarı yaş həddi və ya yaş məhdudiyyəti qoyulmayıb. Yəni qanunvericilik yuxarı yaşda olan şəxslərin sadəcə təvəllüdünə görə sükan arxasına keçməsini qadağan etmir və onların hüquqlarını məhdudlaşdırmır.

Ekspert vurğulayıb ki, bu məsələdə dövlətin və qanunun tələb etdiyi yeganə və ən əsas şərt sürücünün fiziki və psixoloji cəhətdən nəqliyyat vasitəsini idarə etməyə hazır olmasıdır. Hüquqi prosedura əsasən, sənədini yeniləmək istəyən hər bir yaşlı vətəndaş mütləq şəkildə müvafiq qaydada tibbi müayinədən keçməlidir.

Əgər tibbi komissiya şəxsin görmə qabiliyyətini, ümumi reaksiyasını və sanksiyasını yoxladıqdan sonra onun sağlamlıq vəziyyətinin avtomobil idarə etməyə tam imkan verdiyi barədə müsbət rəy verərsə, həmin şəxs heç bir problemlə qarşılaşmadan sürücülük vəsiqəsini yeniləyə bilər.

Hüquqşünas məsələnin birbaşa qanunvericilik tərəfini və açıqlamasında səsləndirdiyi fikirlərin mahiyyətini bu cür ifadə edib:

“Qanunvericilikdə hər hansı bir yaş məhdudiyyəti nəzərdə tutulmayıb. Burada ən əsas və yeganə meyar sürücünün sağlamlıq vəziyyətidir. Vətəndaş ilk növbədə müvafiq tibbi müayinədən keçməlidir. Əgər həkimlərin rəyi müsbət olarsa, yəni sağlamlığı sükan arxasına əyləşməyə imkan verərsə, bəli, bundan sonra o, tam qanuni şəkildə sürücülük vəsiqəsini yenidən ala və nəqliyyat vasitəsini idarə edə bilər".

Qeyd edək ki, qanunun bu yanaşması yaşından asılı olmayaraq, fiziki durumu yerində olan hər bir vətəndaşın hərəkət azadlığını və hüquqlarını qoruyur. Sürücülük vəsiqəsinin müddəti bitən yaşlı sürücülər də sənədlərini yeniləmək üçün ilkin olaraq poliklinikalarda tibbi arayışı (forma 86) təmin etməli və müayinə nəticələrinə uyğun olaraq müvafiq qeydiyyat-imtahan şöbələrinə müraciət etməlidirlər.

Çimnaz Telmanqızı

Həmçinin oxuyun