Rusiya İrana hərbi təlim təyyarələri verib

İran Rusiya istehsalı olan ən yeni Yak-130 təlim təyyarəsini öz sərəncamına verib.

Oxu24.com xəbər verir  ki,bu barədə məlumatı İRNA yayıb.

Təyyarənin artıq İran Hərbi Hava Qüvvələrinin xidmətinə daxil olduğu iddia edilir.

İRNA-nın məlumatına görə, bu təlim təyyarələri İran Hərbi Hava Qüvvələrinin yeni nəsil qırıcılarını idarə edəcək yeni pilotların hazırlanması üçün istifadə olunacaq.

Jurnalistlər qeyd edirlər ki, İrana gələn Yak-130 təyyarəsinin fotoları artıq sosial şəbəkələrdə yayılıb. Rusiyanın İrana nə qədər Yak-130 apardığı hələlik məlum deyil.

Bununla yanaşı, agentlik vurğulayır ki, İran rəsmiləri Rusiyaya məxsus hərbi təyyarənin ölkəyə çatdırılması ilə bağlı hələlik rəsmi açıqlama verməyib.

Yak-130, Yakovlev Dizayn Bürosu tərəfindən İtaliyanın Aermacchi şirkəti ilə birlikdə hazırlanmış Rusiya döyüş təlim təyyarəsidir. Təyyarə İrkutsk Aviasiya Zavodunda istehsal olunur. Əvvəlcə Yak-130 Rusiya Hərbi Hava Qüvvələrində L-39 təlim təyyarəsini əvəz etmək üçün nəzərdə tutulmuşdu, lakin sonradan o da ixrac edildi. Yak-130 SSRİ-nin dağılmasından sonra Rusiyada istehsal edilən ilk tamamilə yeni (mövcud modelin modernləşdirilmiş versiyası deyil) təyyarəsidir. Rusiyadan başqa, Yak-130 Əlcəzair, Vyetnam, Banqladeş, Belarus, Myanma və Suriyada istifadə olunur. Bu təyyarədə xüsusilə pilotlar müasir silah idarəetmə sistemlərinə yiyələnirlər. Yak-130 həm də təkbaşına hücum və kəşfiyyat tapşırıqlarını yerinə yetirə bilir. O, 3 ton silah, köməkçi yanacaq çənləri və elektron avadanlıq bölmələrini saxlayır.

 

Müəllif: Miri Məcidli