Azərbaycan tarixinin səhifələrində 18 oktyabrın bir neçə əlamətdar hadisə ilə yadda qalıb. Xalqımız 1991-ci il oktyabrın 18-də 70 ildən sonra əsarət zəncirlərindən xilas olaraq müstəqilliyini bərpa edib. 2020-ci il 18 oktyabr tarixində isə tarixi Xudafərin körpüsü düşmən işğalından azad edilib. 

Bu tarixi qələbəyə imza atan Dövlət Sərhəd Xidmətinin (DSX) hərbi qulluqçuları idi.  Qəhrəman zabitləri Xudafərinə getmək üçün ilk olaraq Əmirvarlı kəndindəki yüksəkliyi əldə etməli və yolları nəzarətə götürməli idi. 

Hücum əmri uğurla həyata keçirilmişdi. Erməninin yüksəklikdə yerləşən 3 – cü səddi artıq məhv edilmişdi. Eyni zamanda Ermənistan-Qubadlı və Cəbrayıla gedən yol Dövlət Sərhəd Xidmətinin nəzarətinə keçmişdi.

Bu uğurlu əməliyyatdan sonra növbəti hücum əməliyyatı hazırlandı. Xudafərin qısa müddətdə azad olmalı idi. Gecəyarısı Dövlət Sərhəd Xidmətinin xüsusi təyinatlı qrupu erməni xüsusi təyinatlılarının içinə sızmağı bacardı. İtki verən erməni hərbçilər çaş-baş qalmışdı.

Ciddi qarşıdurma baş versə də ordumuz itki vermədən tarixi Xudafərin kəndini və Xudafərin körpüsünü tamamilə azad etmişdi.  
  
Bəli, Xudafərin yenidən Azərbaycan ordusunun nəzarətinə keçdi. Bu xəbər Bütöv Azərbaycanda qürurla yayıldı, sevinclə qarşılandı.