Almaniyada Nazirlər Şurası iqlim dəyişikliyi ilə mübarizədə hədəflərə çatmaq üçün hazırlanmış ölkənin ilk “İqlim Xarici Siyasət Strategiyası”nı qəbul  edib.

Oxu24.com  xəbər  verir   ki,Almaniya Xarici İşlər Nazirliyinin rəhbərliyi ilə hazırlanan 74 səhifəlik İqlim Xarici Siyasət Strategiyasında Almaniya hökumətinin iqlim siyasətinin hədəfləri müəyyən edilib.

Strategiyada iqlim böhranının dünyaya dərindən təsir etdiyi və insan həyatı üçün təhlükə yaratdığı vurğulanıb, iqlim böhranının insan hüquqlarına, təbiətə və həyat üçün zəruri olan resurslara, davamlı iqtisadi inkişaf imkanlarına təhlükə yaratdığı bildirilib.

Strategiya, 2015-ci ildə Parisdə təyin olunmuş sənayedən əvvəlki dövrlə müqayisədə qlobal istiləşməni 1,5 dərəcəyə qədər məhdudlaşdırmaq məqsədinə nail olmaq üçün beynəlxalq ictimaiyyətin sürətli, qətiyyətli və əməkdaşlıqla hərəkət etməsinin vacibliyini vurğulayırdı.

Strategiyada Almaniyanın avropalı tərəfdaşları ilə iqlim hədəflərinin həyata keçirilməsində irəliləyiş əldə etmək üçün tam səy göstərəcəyi bildirilir.

2030-cu ildə istixana qazı emissiyalarını 2019-cu ilə nisbətən yarıya endirməyi hədəfləyən strategiyada Almaniyanın kömür, neft və təbii qazdan "tədricən" mərhələli şəkildə imtina etmək üçün qlobal enerji transformasiyasını sürətləndirmək istədiyi bildirilib.

Almaniyanın yeni strategiyasında daha tez-tez baş verən və şiddətli quraqlıqlar, meşə yanğınları, daşqınlar və tufanlar kimi qlobal istiləşmənin nəticələrindən xüsusilə təsirlənən yoxsul ölkələri dəstəkləmək öhdəliyi götürülüb.

İqlim Xarici Siyasət Strategiyasının müxtəlif nazirliklərin iqlim siyasəti məqsədlərini bir araya gətirməsi, onları ümumi prioritetlərlə uyğunlaşdırması və ahəngdar iqlim xarici siyasəti üçün aydın çərçivə yaratması gözlənilir.

Müəllif: Nigar