Aİ-nin xarici işlər və təhlükəsizlik siyasəti üzrə ali nümayəndəsi Xosep Borrell Rusiyanın xarici işlər naziri Sergey Lavrovun Qərbin “Moldovanı anti-Rusiyaya çevirməyə çalışır” sözlərini şərh edib.

Oxu24.com -un Moldova mətbuatının məlumatına istinadən xəbərinə görə, bu barədə Borrell dünən Moldovanın baş naziri Natalya Qavrilitsa ilə birgə brifinqdə bildirib.

Moldova mətbuatı avropalı diplomatın sözlərini sitat gətirib: "Bir vaxtlar hörmətli diplomat olan cənab Lavrovun bu yola əl atması çox təəssüf doğurur. Bu bəyanatlar onu intellektual cəhətdən nüfuzdan salır. Onun dediklərində ciddi heç nə yoxdur".

Öz növbəsində Moldovanın baş naziri Natalya Qavrilitsa Lavrovun bəyanatlarını "narahatedici" adlandırıb və qeyd edib ki, rusiyalı diplomat Moldovanın "müstəqilliyini və ərazi bütövlüyünü nəzərə almır".

Daha əvvəl Rusiya mətbuatına müsahibəsində Lavrov bildirib ki, Qərb “yeni Ukrayna” rolu üçün Moldovanı nəzərdən keçirir, Moldova lideri Maia Sandu isə “NATO-ya tələsir” və ölkəsini Rumıniya ilə birləşdirməyə hazırdır.

Miri Məcidli