Fransa muxtar ərazi kimi Danimarkanın bir hissəsi olan Qrenlandiyaya qoşun yeritməyə hazırdır.

Bunu Fransa Xarici İşlər Nazirliyinin rəhbəri Jan-Noel Barro Sud Radio ilə söhbətində deyib.

Nazirin şərhi ABŞ prezidenti Donald Trampın adanı ilhaq etmək təhdidləri fonunda verilib. Lakin Barronun sözlərinə görə, Vaşinqton öz planını həyata keçirə bilməyəcək. “Avropa İttifaqının sərhədləri müzakirə mövzusu deyil... Aİ ilə münaqişəyə girmək heç kimin marağında deyil” deyə o, əmin edib.

Fransa Xarici İşlər Nazirliyinin rəhbəri qeyd edib ki, Arktika yeni münaqişə meydanına çevrildiyi üçün qoşunların göndərilməsi zəruri tədbirdir. "Danimarka daha 2 milyard avro sərmayə qoymaqla bu ərazidə hərbi mövcudluğunu artıracağını açıqladı... Biz Arktikanı xarici təsir və ya müdaxilədən qorumaq üçün daha çox iş görməliyik", - o izah edib.

Bundan əvvəl məlum olmuşdu ki, Danimarka hakimiyyəti Avropa İttifaqı və NATO-nu Trampın təhdidlərinə məhəl qoymamağa çağırıb. Qeyd olunur ki, Kopenhagen Brüssel və Şimali Atlantika Alyansı ilə Qrenlandiya məsələsinin ictimai müzakirəsinin minimuma endirilməsi strategiyasını razılaşdırıb.

Yanvarın 25-də Danimarkanın baş naziri Mette Frederiksen Trampla söhbəti zamanı bildirib ki, Qrenlandiya satılmır. Tərəflər arasında söhbətin “çox pis” getdiyi bildirilir. Frederiksenin hərbi bazalar sahəsində əməkdaşlığı genişləndirməyi təklif etməsinə baxmayaraq, ABŞ prezidenti baş nazirin sözlərinə “aqressiv və qarşıdurma” ilə cavab verib.

Nigar