Ağ Ev: Amerikalılar Suriyada qalacaqlar

Ağ Evin yüksək rütbəli rəsmisi bildirib ki, Amerika qoşunları prezident Bəşər Əsədin devrilməsindən sonra İslam Dövləti yaraqlılarını məhv etmək məqsədi daşıyan antiterror missiyası çərçivəsində Suriyada qalacaq.

Prezidentin milli təhlükəsizlik üzrə müşavirinin müavini Con Fayner Reuters agentliyinə deyib ki, “Bu qoşunlar bir növ sövdələşmə vasitəsi kimi deyil, çox xüsusi və mühüm səbəbə görə oradadırlar”.

Onun sözlərinə görə, Amerika qoşunları "İŞİD-ə qarşı mübarizə aparmaq üçün demək olar ki, on il və ya daha çox orada olub... biz bu missiyaya sadiq qalırıq".

ABŞ ordusunun Suriyada qalıb-qalmaması ilə bağlı birbaşa suala Fayner “Bəli” cavabını verib.

Suriyalı üsyançılar, Bəşər Əsədin Rusiyaya qaçmasına səbəb olan ildırımlı hücumdan sonra bazar günü müqavimət göstərmədən Dəməşqi ələ keçirdilər. Suriyanın yeni hökmdarlarının ABŞ-ın ölkədəki varlığını necə qəbul edəcəyi bəlli olmasa da, indi Vaşinqton hərbi mövcudluğunu sabitliyin təminatı kimi qiymətləndirir. Vaşinqton hələ də Əsəd rejimini devirən üsyançı qüvvələrə rəhbərlik edən “Həyat Təhrir əl-Şam”ı terror təşkilatı hesab edir.

Fayner əlavə edib ki, Bayden administrasiyası yeni seçilmiş prezident Donald Trampın komandası ilə əlaqə saxlayır və onu Suriyadakı vəziyyətlə bağlı yeniləyir.

 

Nigar