Ukrayna Xarici İşlər Nazirliyi Gürcüstanda müxalifətin son etirazlarını dəstəkləyib və dinc aksiyaya qarşı güc tətbiqini pisləyib.

Oxu24.com xəbər verir  ki, bu barədə diplomatik departamentin saytında yerləşdirilən məlumatda deyilir.

“Gürcüstanda daxili siyasi vəziyyətin gərginləşməsi oktyabrın 26-da keçirilən parlament seçkilərində çoxsaylı pozuntuların nəticəsidir. Beynəlxalq müşahidəçilər tərəfindən qeydə alınan bütün pozuntular araşdırılmalı və təqsirkarlar məsuliyyətə cəlb edilməlidir”, - bəyanatda deyilir.

Xarici İşlər Nazirliyi həmçinin bəyan edib ki, Ukrayna Gürcüstanın Aİ-yə üzvlüklə bağlı danışıqları dayandırmaq qərarından məyusdur” və bunu “Moskvanın xoşuna gəlmək üçün ölkədəki demokratik proseslərin ləngiməsi” adlandırıb.

Noyabrın 28-də axşam Tbilisidə və Gürcüstanın digər şəhərlərində hakim “Gürcü arzusu” partiyasının Avropa İttifaqı ilə üzvlük danışıqlarını 2028-ci ilə qədər dayandırmasından sonra mitinqlər başlayıb. Müxalifətin etiraz aksiyasında Gürcüstan prezidenti Salome Zurabişvili də iştirak edib.

Təhlükəsizlik qüvvələri nümayişçiləri dağıtmaq üçün təzyiqli su və gözyaşardıcı qazdan istifadə edib. Tbilisidə parlament binası yaxınlığında keçirilən aksiyanın dağıdılması zamanı 30-dan çox polis əməkdaşı yaralanıb.

Bundan əvvəl Gürcüstanın baş naziri Avropa İttifaqı ilə yaxınlaşma şərtini açıqlamışdı.

Nigar