Gürcüstanda mitinqlər başlayır

Tbilisidə Gürcüstan parlamentinin binası qarşısında ötən seçkilərin rəsmi nəticələrindən narazı olan müxalifət partiyalarının mitinqinə hazırlıq gedir.

Oxu24.com  xəbər verir ki, bu barədə RİA Novosti  məlumat yayıb.

Meydanda səhnə və metal konstruksiyalar quraşdırılır. Ərazidə mitinqə hazırlıqlara mane olmayan polislər patrul edir.

Oktyabrın 26-da Gürcüstanda parlament seçkiləri keçirilib. Ölkənin 150 deputatdan ibarət ali qanunverici orqanında yerlər uğrunda 20-yə yaxın partiya mübarizə aparıb. Ardıcıl 12 il hakimiyyətdə olan hakim “Gürcü arzusu” partiyası 54,3% səslə qalib gəlib. Bir neçə partiya parlamenti boykot elan edib, müxalifət partiyası olan “Dəyişiklik Koalisiyası” isə deputat mandatlarından və dövlətin maliyyə dəstəyindən imtina edib.

Gürcüstan prezidenti Salome Zurabişvili parlament seçkilərində “tam saxtakarlıq” və “səslərin oğurlanması” olduğunu açıqlayıb. Onun fikrincə, respublika vətəndaşları “çox qeyri-adi bir şeyin” şahidi olublar.

Seçkilərdə qalib gələn “Gürcü arzusu” partiyası ölkə prezidenti Salome Zurabişvilini iğtişaşlar hazırlamaqda birbaşa ittiham edib.

 

Bundan əvvəl ABŞ Gürcüstanda parlament seçkilərində baş verən pozuntularla bağlı araşdırma aparmağa çağırıb.

 

Nigar