Udmurtiyanın Votkinsk şəhərinin sakinləri çərşənbə günü axşam saatlarında şəhər yaxınlığında güclü partlayış baş verdiyini bildiriblər.

“Azadlıq” radiosu yazır ki, onlar sosial şəbəkələrdə partlayışdan sonra yaranan güclü alovların nəzərəçarpacaq dərəcədə göründüyü videolar yayıblar.

Bəzi teleqram kanalları partlayışa Votkinsk Maşınqayırma Zavodunda texniki işlərin səbəb olduğunu bildirib.

Baza telegram kanalı mənbəyə istinadən yazır ki, partlayışa səbəb Votkinsk zavodunda sınaqlar olub. Udmurtiyanın Zavyalovski rayonunun Vahid Dispetçer Xidmətindən TASS-a bildirilib ki, partlayış raket mühərriklərinin planlı sınaqları zamanı baş verib.

Votkinsk zavodu Udmurtiyanın paytaxtı İjevskdən 50 kilometr aralıda yerləşir. Topol-M və İsgəndər kompleksləri üçün strateji ballistik raketlər də daxil olmaqla artilleriya raketləri istehsal edir. 2023-cü ilin sonunda Votkinsk zavodu nüvə silahı komponentlərinin istehsalı üçün 19 dövlət müqaviləsi dərc edib. Zavodda sınaq meydançası var.