Qasırğa nəticəsində Həştərxan vilayətinin sakinləri işıqsız qalıb

Rusiyanın  Həştərxan vilayətinin 30 mindən çox sakini qasırğa səbəbindən işıqsız qalıb.

 

Oxu24.com  xəbər  verir  ki, bu barədə vilayətin qubernatoru İqor Babuşkin özünün Telegram kanalında məlumat verib.

 

“Rayonun 33 yaşayış məntəqəsində əlverişsiz hava şəraiti ilə əlaqədar elektrik enerjisinin verilişində qəza baş verib. Nəticədə 30 mindən çox Həştərxan sakini elektrik enerjisindən məhrum olub”, - deyə Babuşkin paylaşıb.

 

Onun sözlərinə görə, artıq energetiklər tüğyan edən fəlakətin nəticələrini aradan qaldırmağa başlayıblar. Bütün təcili yardım xidmətləri yüksək hazırlıq vəziyyətindədir. Fövqəladə bərpa işlərinin gecə yarısına qədər başa çatdırılması gözlənilir.

 

Babuşkin əlavə edib ki, bölgəni qasırğa vurub, küləyin sürəti 32 m/s-ə çata bilər. O, rayon sakinlərinə çox zərurət olmadıqca evlərini tərk etməməyi, küçələrdə ağaclardan, reklam konstruksiyalarından və elektrik xətlərindən uzaq durmağı tövsiyə edib.

Bundan əvvəl Omsk vilayətində qasırğa səbəbindən bir neçə federal magistral yol bağlanmışdı.

 Nigar