Ölkəmizdə koronavirusa yoluxma halları getdikcə azalır.

Bunu Trend-in sualına cavab olaraq infeksionist-hepatoloq Mərdan Əliyev bildirib.

"Yoluxmanın azalması virusun tam bitməsi demək deyil. Koronavirusa yoluxmanın azalması mövsümlə bağlı olsa da, əsas səbəb ölkəmizdə vaksinasiya prosesinin sürətli getməsidir. Ölkə əhalisinin təxminən 80%-nə qədəri iknci doza vaksin olunub. Üçüncü doza vaksin vurduranlar da kifayət qədərdir. Yoluxmanın azalması insanları aldatmasın. Vətəndaşlarımıza tövsiyəmiz odur ki, vaksin olunsunlar.

Vətəndaşlarımız üçün aktual olan suallardan biri də fərqli vaksinlər vurdurarkən "problem olmaz ki?" sualıdır. Lakin üç fərqli vaksin vurula bilər. Vaksinlər fərqli olsalar da, əsas mexanizmləri koronavirusa qarşı antitellər yaratmaqdır. Buna baxmayaraq, bir vaksinin azı iki dəfə vurulması daha effektiv nəticə verir", - M.Əliyev əlavə edib.

Qeyd edək ki, dünənə olan məlumata görə, Azərbaycan Respublikasında koronavirus (COVID-19) infeksiyasına 62 yeni yoluxma faktı qeydə alınıb, 46 nəfər müalicə olunaraq sağalıb.
 
Nazirlər Kabineti yanında Operativ Qərargahdan Trend-ə verilən xəbərə görə, COVID-19 üçün götürülən analiz nümunələri müsbət çıxmış 4 nəfər vəfat edib.

Azərbaycanda indiyədək ümumilikdə 791 876 nəfər koronavirus infeksiyasına yoluxub.