DEPUTAT:8 Noyabr müstəqil Azərbaycan dövlətinin siyasi iradəsinin təntənəsinə çevrilib

Hər xalqın tarixində elə günlər olur ki, təqvimdəki sadə rəqəm bir millətin yaddaşına, taleyinə və gələcəyinə çevrilir. 8 Noyabr Azərbaycan üçün məhz belə bir gündür. Bu, sadəcə Şuşanın qayıtdığı tarix deyil, otuz ilə yaxın davam edən haqsızlığa, işğala və illərlə kağız üzərində qalan beynəlxalq qətnamələrə qoyulmuş nöqtədir. 1993-cü ildə qəbul edilmiş BMT Təhlükəsizlik Şurasının dörd qətnaməsi illərlə yerinə yetirilmədi, ədalət gözləyən xalq isə səbrini, ordusunu və iradəsini qurmağa davam etdi. Amma Zəfər təkcə döyüş meydanında qazanılmadı. Müasir müharibənin qanunları dəyişib: cəbhə xətti artıq yalnız xəritədə deyil, diplomatik masalarda, informasiya məkanında, dünya telekanallarının efirlərində də keçir. 2020-ci il sentyabrın 27-də başlayan 44 gün ərzində Azərbaycan eyni vaxtda üç cəbhədə mübarizə apardı: hərbi, siyasi-diplomatik və informasiya. Bir tərəfdə dronlar, kəşfiyyat və dəqiq zərbələr, digər tərəfdə beynəlxalq təzyiqlərə qarşı təmkin və prinsipiallıq, üçüncü tərəfdə isə dünya auditoriyasına birbaşa ünvanlanan söz. Bu üçlüyün uyğunluğu qələbənin sirrini izah edən əsas açarlardan biridir.

Bəs bu Qələbənin arxasında nə dayanır? Ordunun peşəkarlığı, xalqın birliyi, siyasi liderliyin qətiyyəti, yoxsa informasiya savaşında deyilən sözün gücü? Qeyd edək ki, ekspertlərin fikirləri bu suala hərtərəfli cavab verməyə imkan yaradır.

Milli Məclisin deputatı Müşviq Cəfərov Oxu24.com-a  bildirib ki, Azərbaycan Prezidenti İlham Əliyevin Vətən müharibəsi dövründə Ali Baş Komandan kimi nümayiş etdirdiyi qətiyyətli liderlik, siyasi iradə və strateji yanaşma Azərbaycanın tarixi Zəfərinin qazanılmasında həlledici və əsas rolu oynadı. Müharibənin ilk günündən etibarən onun rəhbərliyi ilə həyata keçirilən çoxşaxəli fəaliyyət həm döyüş meydanında, həm də diplomatik və informasiya cəbhələrində qələbəni təmin etdi.

O qeyd edib ki, Azərbaycanın müstəqillik tarixində torpaqlarımızın işğaldan azad edilməsi, ölkəmizin ərazi bütövlüyünün bərpası hər zaman dövlət siyasətinin əsas prioritetlərindən biri olmuşdur. Ermənistanın uzun illər davam edən işğalçılıq siyasəti nəticəsində Azərbaycanın ərazisinin bir hissəsi işğal altında qalmış, yüz minlərlə soydaşımız doğma yurdlarından didərgin düşmüşdür. İşğal dövründə şəhər və kəndlərimiz dağıdılmış, tarixi-mədəni abidələrimizə, dini və milli irsimizə ciddi ziyan vurulmuşdur.

M.Cəfərov əlavə edib ki, Azərbaycan dövləti bütün bu illər ərzində münaqişənin beynəlxalq hüququn norma və prinsipləri əsasında həllinə çalışmış, ölkəmizin ərazi bütövlüyünün bərpası istiqamətində ardıcıl siyasi və diplomatik fəaliyyət həyata keçirmişdir. Cənab Prezident İlham Əliyevin rəhbərliyi ilə həyata keçirilən dövlət siyasətinin mühüm istiqamətlərindən biri güclü və müasir ordunun formalaşdırılması olmuşdur. Ölkəmizin iqtisadi imkanlarının genişlənməsi, müdafiə sənayesinin inkişafı, hərbi texnologiyaların əldə edilməsi, hərbi qulluqçuların peşəkarlığının artırılması və döyüş hazırlığının gücləndirilməsi Azərbaycan Ordusunun qüdrətini əhəmiyyətli dərəcədə artırmışdır.

Deputatın sözlərinə görə, Prezident İlham Əliyevin müharibə dövründəki fəaliyyəti siyasi və informasiya cəbhələrində də mühüm əhəmiyyət daşımışdır. Dövlət başçısı beynəlxalq media nümayəndələrinə çoxsaylı müsahibələr vermişdir. Bu müsahibələrdə Azərbaycanın mövqeyi ətraflı şəkildə izah olunmuşdur. Ermənistanın işğalçılıq siyasətinin nəticələri dünya ictimaiyyətinin diqqətinə çatdırılmışdır. Prezident beynəlxalq hüquqa və BMT Təhlükəsizlik Şurasının müvafiq qətnamələrinə istinad etmişdir. Azərbaycanın öz ərazi bütövlüyünü bərpa etmək hüququ əsaslandırılmışdır. Dövlət başçısının çıxışları xalqımızın haqlı mübarizəsinin dünyada tanıdılmasına xidmət etmişdir.

Millət vəkili vurğulayıb ki, müharibə zamanı informasiya mübarizəsi xüsusi əhəmiyyət kəsb etmişdir. Azərbaycan cəmiyyəti saxta xəbərlərə qarşı diqqətli olmağa çağırılmışdır. Dövlətin rəsmi məlumatları cəmiyyət üçün əsas informasiya mənbələrindən birinə çevrilmişdir. Prezidentin xalqa müraciətləri böyük ruh yüksəkliyi yaratmışdır. Hər bir müraciət vətəndaşlarda qələbəyə inamı gücləndirmişdir. İnsanlar cəbhədən gələn xəbərləri diqqətlə izləyirdilər. Azad edilən yaşayış məntəqələrinin adları xalqımızda sevinc doğururdu.

M.Cəfərov sonda bildirib ki, Azərbaycanın siyasi rəhbərliyi müharibə dövründə milli maraqları əsas tutmuşdur. Qazanılan uğur ölkəmizin beynəlxalq nüfuzuna müsbət təsir göstərmişdir. Beləliklə, 8 Noyabr müstəqil Azərbaycan dövlətinin siyasi iradəsinin təntənəsinə çevrilmişdir.

Həmçinin oxuyun

Zakir Həsənovdan SƏMİMİ FOTOLAR

Tovuzun icra başçıları niyə həmişə tovuzlu olur? – 35 illik maraqlı ənənənin sirri 

Rəsmilər Zəfər Parkını ziyarət edir

Biləsuvarda anasının məzarı başında ölü tapılan şəxslə bağlı yeni detallar