Azərbaycanda bu qədər məscid var imiş   — AÇIQLAMA 

Azərbaycanda İslam dininə dövlət qayğısı ibadət yerlərinin bərpası ilə yanaşı, din xadimlərinin sosial təminatını, dini icmaların fəaliyyətinin dəstəklənməsini və milli-mənəvi irsin qorunmasını da əhatə edir.

Oxu24.com xəbər verir ki,bu fikirləri Trend-ə açıqlamasında Milli Məclisin Elm və təhsil komitəsinin üzvü, deputat Vasif Qafarov deyib.

Onun sözlərinə görə, 2020-2026-cı illərdə həyata keçirilən tədbirlər dini-mənəvi dəyərlərin yaşadılmasına və cəmiyyətdə mənəvi həmrəyliyin möhkəmləndirilməsinə xidmət edib.

Deputat qeyd edib ki, hazırda Azərbaycanda 2 389 məscid var və bu ibadət yerlərində eyni vaxtda təxminən 600 min insan ibadət edə bilər. Son illərdə dövlətin dəstəyi ilə ölkənin müxtəlif bölgələrində məscidlər və ziyarətgahlar bərpa olunub.

V.Qafarov vurğulayıb ki, bu işlərin əhəmiyyəti yalnız dini tikililərin yenilənməsi ilə məhdudlaşmır. Bərpa olunan hər bir məscid və ziyarətgah xalqın tarixi yaddaşının, mədəni irsinin və mənəvi bağlılığının qorunmasına töhfə verir.

Deputatın fikrincə, bu siyasət işğaldan azad edilmiş ərazilərdə xüsusi əhəmiyyət daşıyır. Şuşada Yuxarı və Aşağı Gövhər Ağa, Saatlı və digər məscidlərdə, Ağdamın Cümə məscidində, eləcə də başqa dini abidələrdə aparılan bərpa işləri Qarabağın tarixi-mədəni simasının dirçəldilməsinin mühüm hissəsidir. Şuşada yeni məscidin inşası isə azad edilmiş ərazilərdə dini həyatın və şəhər mühitinin gələcək inkişafının təmin edilməsinə xidmət edir.

V.Qafarov bildirib ki, dövlət qayğısının digər mühüm istiqaməti din xadimlərinin və dini qurumların dəstəklənməsidir:

"Hazırda 1 204 din xadiminə maddi yardım göstərilir. Bundan əlavə, 2025-ci ildə Vətən müharibəsində qazanılmış Zəfərin beşinci ildönümü münasibətilə 1 197 din xadiminə birdəfəlik maddi yardım verilib".

O əlavə edib ki, dini konfessiyalara ayrılan dövlət maliyyə dəstəyi də artıb. Belə ki, 2020-ci ildə 3,25 milyon manat təşkil edən illik dəstəyin həcmi 2026-cı ildə 6,3 milyon manata çatıb.

Deputatın sözlərinə görə, dövlət siyasətinin mühüm nəticələrindən biri dini dəyərlərin qorunması ilə dövlətçilik maraqlarının və ictimai birliyin uzlaşdırılmasıdır. Hazırda Azərbaycanda dövlət qeydiyyatından keçmiş 994 dini icma fəaliyyət göstərir ki, onların 956-sı İslam dini icmalarıdır.

“Bu göstəricilər ölkədə dini həyatın institusional əsaslarının genişləndiyini və dini icmaların fəaliyyətinə diqqətin davamlı xarakter daşıdığını göstərir”, - deyə V.Qafarov qeyd edib.

O vurğulayıb ki, 2020-2026-cı illərdə görülən işlərə ayrı-ayrı layihələr kimi deyil, milli-mənəvi irsin qorunmasına və dini icmaların fəaliyyətinin dəstəklənməsinə yönəlmiş ardıcıl dövlət siyasətinin tərkib hissəsi kimi yanaşmaq lazımdır.

Deputatın fikrincə, bu siyasət Azərbaycanın tarixi irsinə sahib çıxmasının, dini dəyərlərə hörmətin və cəmiyyətdə həmrəyliyin möhkəmləndirilməsinin mühüm göstəricisidir.

Həmçinin oxuyun

Bakıda evlər sökülür: Ağaclar, zirzəmi, hasarlara da pul verilir 

Müəllimlərə ŞAD XƏBƏR! Rəsmən elan edildi

İşdən çıxarılan şəxslərə kredit borcları ilə bağlı ŞAD XƏBƏR

Azərbaycan sərhədçilərinə atəş açan şəxs zərərsizləşdirildi - Foto