Süni intellekt tarixi rekorda imza atır: 5 ildə minlərlə yeni milyonçu yaranacaq   

Süni intellekt texnologiyalarının sürətli inkişafı qlobal iqtisadiyyatda və rəqəmsal bazarda bənzərsiz miqyaslı zənginləşmə dalqası yaratmağa hazırlaşır. İnnovativ həllər və avtomatlaşdırma imkanları sayəsində kiçik komandalar belə qısa müddətdə qlobal miqyaslı uğurlara imza atmaq gücü qazanır. Mütəxəssislərin proqnozlarına görə, süni intellekt cəmi beş il ərzində internetin ötən 20 ildə yaratdığından daha çox milyonçu yetişdirəcək. Bu dəyişikliklər fonunda yerli bazarın potensialı və gənclərin imkanları xüsusi əhəmiyyət kəsb edir. Yeni dövrün reallıqları göstərir ki, ənənəvi biznes modelləri sürətlə rəqəmsal həllərlə əvəz olunur. Süni intellektin təqdim etdiyi bu misilsiz fürsətlər həm də sahibkarlıq mühitində ciddi rəqabət formalaşdırır. Ölkəmizdə də bu sahəyə göstərilən maraq ildən-ilə artmaqdadır.

Mövzu ilə bağlı İT mütəxəssisi Elvin Abbasov Oxu24.com-a açıqlamasında bildirib ki, süni intellektin sürətli inkişafı gələcəkdə yeni sərvətlərin yaranmasına böyük təsir göstərə bilər:

"Süni intellekt tək bir insanın və ya balaca bir komandanın iş görmək gücünü dəfələrlə artırır. İndi əsas məsələ nə qədər çox kod bilməyiniz yox, hansı konkret problemi necə sürətlə həll edə bildiyinizdir”.

Mütəxəssisin sözlərinə görə, yaxın illərdə ən böyük gəlir hamının istifadə etdiyi ümumi proqramlardan deyil, sahəvi ehtiyaclara ünvanlanan konkret ideyalardan gələcək. Məsələn, həkimlərin, hüquqşünasların və ya tikinti mühəndislərinin rutin işlərini üstünə götürən xüsusi süni intellekt köməkçiləri, yalnız suala cavab verməyib tapşırığı başdan-ayağa icra edən avtonom agentlər və media sahəsində işləri kəskin ucuzlaşdıran vizual alətlər böyük bir bazar formalaşdırır. Məzmun yaradılması və texniki işlər asanlaşdıqca, əsas dəyər birbaşa ideyaya və icra sürətinə keçir.

Elvin Abbasov Azərbaycandakı gənclər və startaplar üçün də bu prosesdə mühüm fürsətlərin yarandığını vurğulayıb:

"Böyük qlobal şirkətlərlə birbaşa yarışmaq yerinə, öz dilimizdə, öz rəqəmsal bazarımızda və ya kənd təsərrüfatı, bankçılıq kimi sahələrdə olan yerli ehtiyaclara fokuslanmaq daha səmərəlidir. Bu gün minimal büdcə ilə qlobal süni intellekt alətlərini götürüb yerli bir problemi həll edən sistem qurmaq tamamilə mümkündür. Dövlətin rəqəmsal proqramları, güzəştlər və vençur fondları da ilk addımı atmaq üçün yaxşı zəmin yaradır”.

Çimnaz Telmanqızı

Həmçinin oxuyun

Leyla Əhmədova xaricdə deyil, 1 aydır həbsdə imiş... - Detallar 

Şəkidə kanat faciəsinin şok TƏFƏRRÜATI: Tros qırılıb, yoxsa? - FOTO  

Hava ilə bağlı son dəqiqə açıqlaması

Lombard QALMAQALI: 10 minlik qızılı götürüb qaçdı