Azərbaycanda iş yerləri ilə bağlı statistika: Paytaxt və region fərqi  

Azərbaycan iqtisadiyyatında son illərin ən aktual müzakirə mövzularından biri də yeni iş yerlərinin yaradılması və məşğulluq göstəricilərinin keyfiyyətidir.

Rəsmi statistika 2025-ci ildə on minlərlə yeni vakansiyanın yaradıldığını və işsizlik səviyyəsinin aşağı olduğunu (5-6%) göstərsə də, bu rəqəmlərin arxasındakı struktur fərqlilikləri və regional qeyri-bərabərlik ciddi suallar doğurur. Xüsusilə iş yerlərinin böyük əksəriyyətinin paytaxtda cəmləşməsi və dövlət sektorunun bu prosesdəki payının azalması yeni bir iqtisadi reallığın formalaşdığından xəbər verir.

İqtisadçı ekspert Eldəniz Əmirov mövzu ilə bağlı  Oxu24.com-a verdiyi açıqlamada, iş yerlərinin açılma dinamikasını, xidmət sektorunun artan rolunu və regionlardakı məşğulluq vəziyyətini təhlil edərək maraqlı məqamlara toxunub. Ekspertin fikrincə, gələcəkdə əmək bazarının əsas hərəkətverici qüvvəsi məhz özəl sektor olacaq.

“Azərbaycanda müvafiq dövlət qurumunun açıqladığı statistikada 2025-ci ildə 100 mindən artıq yeni iş yeri açıldığı bildirilir. 

Eynilə də rəsmi məlumatda bildirilir ki, işsizlik səviyyəsi 5-6% civarındadır. Rəsmi statistika heç də işsizliyin yüksək olduğunu göstərmir. Sadəcə olaraq rəsmi statistikada qeyd edilən rəqəmlərin reallıqda hansı formada olması isə artıq digər alternativ qiymətləndirmələr nəticəsində nəsə demək olar. Bu məsələnin birinci tərəfi.

İqtisadiyyatın hansı sahələrində iş yerlərinin açılması daha çox nəzərə çarpır sualına gəldikdə: hesab edirəm ki, iş yerlərinin açılması daha çox xidmət sektorunu əhatə edir.

Regionlar üzrə məşğulluqla bağlı qənaətbəxş olmayan əsas məsələ odur ki, hər yeni açılan 5 iş yerindən 4-ü Bakının payına düşür. Yəni, hər 100 açılan iş yerindən 80-i Bakıda açılır. Bu da Dövlət Statistika Komitəsinin rəqəmlərinə əsasən, verilən məlumatdır. 

Ümumiyyətlə, məşğulluqla bağlı ən xoşagəlməz məqam budur.

Hansı sahələrdə gələcəkdə iş yerlərinin açılmasına gəlincə: düşünürəm ki, bütün hallarda yeni iş yerləri daha çox özəl sektorda açılır. Çünki, dövlət qurumlarında yeni iş yerləri artıq açılmır, çox nadir hallarda açılır. Bu da bəzən müxtəlif struktur islahatları nəticəsində mümkün olur (birləşmələr, ayrılmalar və s.).

Amma böyük ölçüdə yeni iş yerlərini yaradan özəl sektordur. Dövlətin özəl sektora diqqəti artdıqca, özəl sektorun payı qarşıdakı dönəmdə də artacaqdır. Hesab edirəm ki, xidmət sektoru qarşıdakı dönəmdə də yeni açılan iş yerləri arasında əsas birinci yerdə qərarlaşacaqdır”,-deyə ekspert bildirib.

Həmçinin oxuyun

Nazirdən Azərbaycanda maaş artımı ilə bağlı AÇIQLAMA

Metroda faciə:Ölən var

Pensiyalarla bağlı RƏSMİ AÇIQLAMA 

İlham Əliyev fərman imzaladı : Onlar da güzəştli siyahıya salındı

Çimnaz Telmanqızı