Ağdam və Cəbrayıla hansı universitetlər köçürüləcək? - AÇIQLAMA

Son illərdə Bakı sürətlə artan əhali və nəqliyyat sıxlığı səbəbindən ciddi yüklənmə ilə üz-üzə qalıb. Günün əksər saatlarında müşahidə olunan tıxaclar, infrastrukturun həddindən artıq yüklənməsi və şəhər həyatının çətinləşməsi paytaxtda yaşamağı getdikcə daha mürəkkəb hala gətirir. Mövcud vəziyyətdən çıxış yolu kimi müxtəlif təkliflər irəli sürülür ki, bunlardan biri də paytaxtın və eləcə də Bakıda fəaliyyət göstərən bəzi ali təhsil müəssisələrinin ölkənin digər bölgələrinə köçürülməsi ideyasıdır.

Oxu24.com xəbər verir ki mövzu ilə bağlı 118 saylı Ağdam - Xocalı seçki dairəsinin deputatı Elman Məmmədov Redaktor.az-a bildirdi ki, universitetlərin paytaxtdan kənarda fəaliyyəti dünya təcrübəsində mövcuddur:

"Məsələn, biz qardaş Türkiyənin İstanbul, Ankara şəhərlərinə, yaxud Amerika Birləşmiş Ştatlarının Nyu-York, Vaşinqton şəhərlərinə, Pekin və Çinin inkişaf etmiş, ticarətlə bağlı çox mühüm mərkəzlərinə nəzər sala bilərik. Bir sıra digər ölkələri də sadalamaq olar. Yəni paytaxtı, Bakını bu problemlərdən qismən azad etmək, tıxac problemini, yüklənmə problemini və müxtəlif narahatlıq yaradan məsələləri aradan qaldırmaq üçün təkcə universitetlərin regionlara köçürülməsi kifayət etmir. Hətta demək olar ki, bir sıra nazirliklərin, komitələrin, dövlət agentliklərinin də bölgələrə köçürülməsi məsələsinə baxılmalıdır və bu zəruridir, buna diqqət yetirilməlidir. Eyni zamanda bu məsələdə təkcə universitetlərlə, dövlət qurumları ilə, nazirliklərlə, agentliklərlə, komitələrlə məhdudlaşmaq olmaz. Bir sıra böyük şirkətlər, özəl və dövlət səviyyəli müəssisələr, istehsal sahələri də mövcuddur. Bunların da bölgələrə, xüsusilə ucqar ərazilərə köçürülməsi məsələsi gündəmə gətirilməlidir. Artıq bu gizli deyil ki, sərhədyanı bölgələrdə, ucqar və dağ rayonlarında əhalinin yaşaması üçün müəyyən çətinliklər mövcuddur. İş yerlərinin azlığı və dolanışıq problemləri bu çətinliklərin əsas səbəblərindəndir. Bütün bu problemlərin həlli üçün hesab edirəm ki, respublikanın bütün bölgələrini əhatə edən bu kimi məsələlərlə məşğul olmağa başlamaq lazımdır və bu prosesi gecikdirmək olmaz".

Deputat Ağdama köçürüləcək universitetlərdən də bəhs etdi:

"Ağdama hansı universitetlərin köçürülməsinin məqsədəuyğun olmasına gəldikdə isə konkret universitet adı çəkmək çətindir. Lakin bir məqam aydındır ki, cənab prezidentin rəhbərliyi ilə həyata keçirilən qayıdış proqramına əsasən bu gün Ağdam müasir, böyük şəhər kimi yenidən qurulur və burada bütün infrastruktur ən yüksək səviyyədə nəzərdə tutulur. Buna görə də istənilən universitetin və ya universitetlərin Ağdamda fəaliyyət göstərməsi məqsədəuyğun hesab olunur. Eyni zamanda müəyyən nazirliklərin, komitələrin, agentliklərin və böyük sahibkarların fəaliyyət sahələrinin Ağdamda, Qarabağın digər bölgələrində, eləcə də qərb, cənub və şimal bölgələrində yerləşdirilməsi yalnız Bakının yükünü azaltmaq məqsədi daşımır. Bu addımlar eyni zamanda regionlarda mövcud olan işsizlik probleminin həllinə ciddi və müsbət təsir göstərir. Hesab edirəm ki, bu məsələ aktualdır və mütləq şəkildə diqqət mərkəzində saxlanmalıdır".

120 saylı Cəbrayıl - Qubadlı seçki dairəsinin deputatı Ceyhun Məmmədov isə sualımıza cavab olaraq bildirdi ki, hazırda tikinti-quruculuq işləri gedən Cəbrayıl rayonu ərazi baxımından kiçik yerdir:

"Ora hansısa univeristetin köçürülməsi məqsədəuyğun sayılmır".

Həmçinin oxuyun

Azərbaycanda bu şəxslər 53 yaşında pensiyaya ÇIXACAQ

Əli Əsədov qərarı İMZALADI:Bu müddət 6 aya endirilib

1 oktyabrda bizi nələr gözləyir?  —   ULDUZ FALI

Türkiyə həmin silahı Azərbaycana verir:Hansı gücdə olduğunu EKSPERT AÇIQLADI