Bu istiqamətdə də ödənişli yol çəkiləcək - AÇIQLAMA

Ölkəmizdə bir müddətdir ki, ənənəvi yola alternativ olaraq, ödənişli yollar da sürücülərin istifadəsinə verilib. Bu cür yolların əsas məqsədi nəqliyyat axınını sürətləndirmək, alternativ marşrutlar yaratmaqdır. Sürücülər bu yollardan müəyyən ödəniş qarşılığında istifadə edirlər, ödənişlər isə elektron sistemlər və ya giriş-çıxış məntəqələri vasitəsilə həyata keçirilə bilər.

Bəs gələcəkdə hansı istiqamətlərdə ödənişli yolların tətbiqi gözlənilə bilər?

Oxu24.com xəbər verir ki, mövzu ilə bağlı redaktor.az-a açıqlamasında nəqliyyat eksperti Elməddin Muradlı bildirdi ki, hazırda ödənişli yollardan kifayət qədər istifadə olunur:

"İndiki halda Azərbaycanda bu yoldan kifayət qədər istifadə edən var. Qiymətlər də o qədər də baha deyil. Gələcəkdə əgər zərurət yaranarsa, bu məsələyə bir daha baxmaq olar. Qanunvericiliyə görə, ödənişli yol digər yolla paralel inkişaf etməlidir. Yəni ödənişsiz yol da eyni infrastruktura, eyni imkana malik olmalıdır ki, vətəndaşlar oradan rahat və təhlükəsiz şəkildə istifadə etsinlər. Bu imkanlar mütləq yaradılmalıdır. Məsələ artıq çoxdan müzakirə olunub. Qiymət məsələsinə də baxılıb. Normal bir mexanizm, qiymətlər müəyyənləşdirilib və bundan artığı artıq gələcəkdə zəruri bir məsələ ortaya çıxarsa, gündəmə gətirmək olar. İndiki halda istifadə ilə bağlı hər hansı bir problem görmürəm. Yalnız müəyyən qaydalar tətbiq edilməlidir. Çünki Azərbaycanda bu, ilkdir və müəyyən çətinliklər, problemlər də olur. Adətən ilk addımlarda indiki halda artıq rahat istifadə olunur".

Ekspertin fikrincə, bu addım həm sürətli və təhlükəsiz hərəkəti təmin edəcək, həm də beynəlxalq yükdaşıma və sərnişindaşıma sahəsində mühüm rol oynayacaq.

"Bir çox istiqamətlərdə də belə yolların olması nəzərdə tutulur. İşğaldan azad olunan ərazilərə doğru da belə yolların çəkilməsi planlaşdırılır. Hazırda şimal istiqamətində bu var, cənub istiqamətində də artıq özünü doğruldacaq və müəyyən istiqamətlərdə olmalıdır. Bu, beynəlxalq yükdaşımalar, sərnişindaşımalarda beynəlxalq yol hərəkətində qəbul edilmiş bir variantdır, üsuldur və insanlar da bundan çox səmərəli şəkildə istifadə edirlər. Kimsə sürətli getmək, daha tez çatmaq, daha komfortlu yol istəyirsə, pulunu ödəyir və həmin yoldan istifadə edir. Burada hər hansı bir problem yoxdur. Ancaq yoldan istifadə qaydalarının pozulması, ödənişlə bağlı müəyyən yeniliklər artıq yavaş-yavaş tətbiq edilir. Daha rahat və asan formada ödənişlərin həyata keçirilməsi və digər mövzular barədə zaman-zaman məlumatlar verilir", - deyə E.Muradlı qeyd etdi.