71 yaşlı Putin gənc qalmağın sirrini axtarır -Göstəriş verdi

71 yaşlı Rusiya lideri Vladimir Putinin elm adamlarına qocalmanın təsirlərini azaltmaq üçün üsullar tapmağı tapşırdığı iddiası gündəmə gəlib.

OXU24.COM  xəbər verir ki, bu barədə Britaniyanın “Daily Mail” qəzeti yazıb.

Bildirilir ki, Putin bu yolla özünün və administrasiyasındakı yaşlı yaxın adamlarının ömrünü uzatmağı hədəfləyir.

Tez-tez plastik əməliyyat etdirdiyi iddiaları ilə gündəmə gələn Putinin uzun müddətdir yaşlanma əleyhinə üsullarla maraqlandığı qeyd olunur.

Səhiyyə Nazirliyindən tədqiqat klinikalarına göndərilən yeni məktuba əsasən, hökumət həmçinin qocalmanı ləngidən, koqnitiv problemlərin qarşısını alan və immuniteti gücləndirən ən son texnologiya və inkişaflar haqqında məlumat tələb edib.

Qeyd edək ki, mart ayında yenidən prezident seçilən Putin qanuna görə, 2036-cı ilə qədər, yəni 80 yaşına qədər vəzifəsində qala bilər.

Putinə ən yaxın məmurlar arasında Rusiyanın xarici işlər naziri Sergey Lavrovun 74, kəşfiyyat rəhbəri Aleksandr Bortnikovun 72, parlamentin sədri Valentina Matviyenkonun isə 75 yaşı var.