Miras payı ilə bağlı çoxlarını düşündürən SUALA CAVAB

Xaricdə yaşayan vərəsə mirası rəsmiləşdirmirsə, payın taleyi necə həll olunur?

Miras qaldıqda vərəsələrdən birinin xaricdə yaşaması prosesi xeyli çətinləşdirə bilər. Bəzən həmin şəxs qanunla müəyyən edilmiş müddətlər ərzində Azərbaycana gələ bilmir, bəzən isə üzərinə düşən payla bağlı heç bir addım atmır. Bu isə digər vərəsələrin əmlakdan istifadəsinə və onun üzərində mülkiyyət hüquqlarını həyata keçirməsinə maneə yarada bilər. 

Oxu24.com xəbər verir ki, qanunvericilik belə hallar üçün bir sıra mexanizmlər nəzərdə tutur.

Xaricdə yaşayan vərəsə üzərinə düşən payı satmaq və ya icarəyə vermək istəyirsə, bunun üçün mütləq ölkəyə gəlməli deyil. O, konsulluq vasitəsilə və ya notariat qaydasında təsdiqlənmiş etibarnamə ilə istədiyi şəxsi nümayəndə təyin edə bilər. Bu halda payla bağlı əməliyyatları etibarnamədə göstərilən şəxs vərəsənin adından həyata keçirir.

Digər imkan mobil notariat tətbiqidir. Vərəsə xarici ölkədə yaşayırsa və müddətlər ərzində Azərbaycana gələ bilmirsə, bu tətbiqdən istifadə edərək istədiyi şəxsə nümayəndə təyin edə və etibarnaməni distant qaydada təsdiqlədə bilər. Bu üsul həm vaxta, həm də əlavə xərclərə qənaət etməyə imkan verir. Bəs xaricdə olan vərəsə üzərinə düşən payı rəsmiləşdirməkdən yayınarsa, nə baş verir? Belə olduqda onun payı açıq qalır. Yəni Dövlət Reyestr Xidməti həmin payı mirasbıraxanın, başqa sözlə, vəfat etmiş şəxsin adında saxlayır. Bu vəziyyət əmlak üzərində satış, bağışlama və digər əməliyyatların aparılmasını çətinləşdirir və digər vərəsələrin də maraqlarına təsir göstərir.

Belə hallarda digər vərəsənin hüquqları da qorunur. O, məhkəməyə müraciət edərək müəyyən sübutlarla iddia qaldıra bilər. Məhkəmə isə iki qərardan birini verə bilər. Birinci halda xaricdə olan şəxsin payı digər vərəsəyə verilir. İkinci halda isə pay həmin şəxsin adında qalır və o, istədiyi zaman öz payını sata və ya ondan istifadə edə bilir.

Hüquq mütəxəssisləri vərəsəlik məsələlərində vaxtında addım atmağın vacibliyini vurğulayır. Xüsusilə xaricdə yaşayan vərəsələrə etibarnamə və mobil notariat imkanlarından istifadə etməyi tövsiyə edirlər ki, payın açıq qalması və gələcəkdə məhkəmə mübahisələri yaranması riskinin qarşısı alınsın.

Jalə

Həmçinin oxuyun

Azərbaycan - Türkiyə münasibətlərindəki gərginliyin SƏBƏBLƏRİ AÇIQLANDI

Prezident yeni SƏRƏNCAM İMZALADI:Nazirlər Kabineti üç ay müddətində

Kolleclər və texnikumlar bağlanır? – MÜHÜM AÇIQLAMA

Firuzə İbadova ilə bağlı ÜZÜCÜ XƏBƏR