“Onlar küçələrə axışıb “hepimiz ermeniyiz” deyəndə, etiraz etdikmi?!” – Deputat

Azərbaycan-Türkiyə münasibətləri strateji müttəfiqlik səviyyəsində olsa da, iki ölkənin regional proseslərə yanaşması və milli maraqları hər zaman ayrıca qiymətləndirilməlidir. Türkiyənin Yaxın Şərq və digər bölgələrdə yürütdüyü siyasət, o cümlədən Suriya, Liviya və Sudandakı fəaliyyəti ilə bağlı mübahisəli məqamlar bu məsələnin yenidən müzakirəsinə səbəb olur.

Azərbaycanın milli təhlükəsizlik maraqlarının qorunması baxımından Ankara ilə münasibətlərdə suveren qərarvermə və qarşılıqlı maraqların əsas götürülməsi nə dərəcədə vacibdir?

Oxu24.com xəbər verir ki ,Globalinfo.az-a danışan Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli deyib ki, Azərbaycan sıradan bir ölkə və sıradan bir dövlət deyil:

“Bunu hər kəs anlamalıdır və buna görə davranmalıdır. Azərbaycan azı beş min illik dövlətçilik ənənəsi olan bir ölkədir. Və bu müddət ərzində bu ölkədə çox dövlətlər yaranıb, dağılıb, bir daha yaranıb. Bu ölkədən çox ölkələr və çox xalqlar törəyib. Bu torpaqlarda çoxlarının gözü olub, gəliblər, işğal ediblər, amma bu torpaq onları barındırmayıb, çəkilib gediblər, bu torpaqlar yenə öz sahiblərinə qalıb. Bu ölkədən çıxan insanlar Norveçdən Misirə, İspaniyadan Yaponiyaya, hətta Amerika qitəsinə qədər gedib çıxıblar. Onların ilk beşiyi üç dəniz – Urmiya, Göyçə və Van arasında olub. Bir çox şərtlərlə yanaşı, bu, ilk növbədə bu torpağın özünün daxili gücü, enerjisi və sinerjisi ilə bağlıdır. Ona görə də Azərbaycana münasibətdə heç kəs çaşmamalıdır. Bu, təkcə düşmənlərimizə yox, ən yaxın dostlarımıza, hətta qardaşımız Türkiyəyə də aiddir”.

Deputat bildirib ki, Azərbaycan dövlət olaraq hər kəslə qonşuluq, dostluq və qardaşlıq münasibətləri yaratmaqda və bu münasibətlərdə yaşamaqda maraqlıdır:

“Bu, bizim milli mentalitetimizdən və dövlətçilik ənənəmizdən irəli gəlir. Bu dövlətlər sırasında Türkiyənin xüsusi yeri var. Tarixin məlum dönəmində Azərbaycandan Anadoluya köç edib, güclü bir dövlət qurmuş qardaşlarımızın yanımızda və qəlbimizdə yeri özəldir. Bu gün strateji müttəfiqlik səviyyəsinə qalxan Azərbaycan-Türkiyə münasibətləri bunun əyani sübutudur. Lakin hər iki ölkənin tarixi ənənədən irəli gələn öz dövlət idarəçilik sistemi, iç problemləri, milli və regional maraqları var. Biz dövlət və millət olaraq həmişə bir-birimizə dəstək olmuşuq və olacağıq, lakin bu, bizə Türkiyənin daxili məsələlərinə və regional siyasətinə müdaxilə etmək hüququ vermədiyi kimi, Türkiyəyə də Azərbaycanın daxili işlərinə qarışmaq imtiyazı tanımır”.

Əziz Ələkbərli bu gün AKP iqtidarının Azərbaycan-İsrail münasibətlərini sorğuladığını vurğulayıb:

“Biz də Türkiyənin Yaxın Şərq və digər bölgələrdə yürütdüyü siyasətin, o cümlədən Suriya, Liviya və Sudandakı fəaliyyəti ilə bağlı bir çox məqamları və ya ölkə daxilindəki kürd-PKK münasibətlərini müzakirəyə çıxarsaq, qardaşlarımızın xoşuna gələrmi? Əlbəttə, gəlməz. Türk xalqı axın-axın küçələrə çıxıb “həpimiz Dinkiz, həpimiz erməniyiz” deyəndə erməni zülmündən vaqonlarda, çadırlarda cəhənnəm həyatı yaşayan Qarabağ qaçqınları küçələrə çıxıb qardaş Türkiyəyə etiraz etdimi? Etmədi! Qardaşımızın könlü qırılmasın deyə, ürəyimizin qanını içimizə axıtdıq. Belə misalların sayını istənilən qədər artırmaq olar. Amma etmirik. Çünki bunlar qardaşlığımıza kölgə salar. Nəhayət, “Dədə Qorqud” dastanlarından bir örnək. Hər Oğuz bəyi öz sancağını törəyə uyğun öz bildiyi kimi idarə edir, hətta Bayındır xan, Qazan xan belə həmin bəyliyin iç işlərinə müdaxilə etmir, amma dar gündə bir-birinin köməyinə gəlirlər. Strateji müttəfiqlik budur”.

Həmçinin oxuyun

Kombi istifadə edənlərin NƏZƏRİNƏ 

Türkiyə Prezidentinin Şuşada rəsmi qarşılanma mərasimi keçirilir - CANLI 

Ərdoğanın Azərbaycan səfərinin YENİ DETALLARI

Polkovnik-leytenant: Müharibə dövründə Prezidentin Xalqa müraciətlərini ayrıca qiymətləndirmək lazımdır