Ürək qüsurlu şəxsin pensiyası niyə kəsilib?– RƏSMİ CAVAB

ŞİKAYƏTLƏR

1249

02.06.2026, 17:52

Oxu24.com-un redaksiyasına Ağdaş rayon sakini, 1987-ci il təvəllüdlü Həmzəyeva Nərmin Oruc qızı tərəfindən müraciət daxil olub. İki övlad anası olan vətəndaş, uzun illərdir əziyyət çəkdiyi ağır xəstəliklərə baxmayaraq, əlillik dərəcəsinin əsassız yerə kəsildiyini və pensiyasının dayandırıldığını iddia edib.

Vətəndaşın şikayəti: "Sənədlərim sistemdə olduğu halda əlilliyimi ləğv ediblər"

Şikayətçi Nərmin Həmzəyeva redaksiyamıza ünvanladığı müraciətində qarşılaşdığı çətinlikləri və səhhətindəki mövcud problemləri xəbər xidmətimizə ətraflı şəkildə təqdim edib.

Vətəndaş bildirir ki, səhhətindəki anadan gəlmə patologiyalarla əlaqədar olaraq 2014-cü ildən etibarən rəsmi olaraq əlillik dərəcəsi alıb və müvafiq pensiya təminatından yararlanıb. İlkin mərhələdə hər il müddəti uzadılan əlillik təyinatı, sonradan ardıcıl olaraq iki dəfə 5 illik müddətə qüvvədə saxlanılıb. Lakin cari ilin aprel ayının 16-da rəsmi əlillik müddəti başa çatdıqdan sonra onun pensiya təminatı dayandırılıb.

N.Həmzəyevanın sözlərinə görə, o, təkrar qiymətləndirilmə üçün tələb olunan bütün tibbi müayinələrdən keçsə də, proses iki aydan çox uzadılıb və yekunda ona imtina qərarı göndərilib. Qərardan narazı qalan vətəndaş may ayının 25-də Əlillərin Bərpası Mərkəzinə əyani şəkildə müraciət edib. Orada təkrar exokardioqrafiya və tənəffüs sisteminin müayinələrinə yönləndirilsə də, həkim-mütəxəssislər ona əlillik dərəcəsinin düşmədiyini bildiriblər.

Şikayətçi vurğulayır ki, onun anadan gəlmə döş qəfəsi defekti (sinə çökəkliyi) vizual olaraq aydın görünür və o, 2021-ci ilin may ayında ağır şərtlərlə açıq ürək əməliyyatı keçirib. Elektron rəsmi bazada (FİN kod üzrə) bütün bu ağır cərrahiyyə və xəstəlik tarixcələrinin mövcud olduğunu qeyd edən vətəndaş, əmək qabiliyyətinin olmamasına baxmayaraq pensiyasının haqsız yerə kəsildiyini iddia edir. İki azyaşlı övlad böyütdüyünü və ailənin maddi vəziyyətinin son dərəcə ağırlaşdığını bildirən ana, rəsmi qurumlardan sosial hüquqlarının humanistlik prinsipləri çərçivəsində yenidən bərpa olunmasını xahiş edir.

Aidiyyəti qurumdan Oxu24.com-un sorğusuna RƏSMİ CAVAB

Oxu24.com vətəndaşın müraciəti əsasında aidiyyəti dövlət qurumuna rəsmi sorğu ünvanlayıb.Sorğumuza cavab olaraq Əmək və Əhalinin Sosial Müdafiəsi Nazirliyi yanındakı Dövlət Tibbi-Sosial Ekspertiza və Reabilitasiya Agentliyindən redaksiyamıza rəsmi açıqlama daxil oldu.

Qurumun verdiyi rəsmi cavabda bildirilir:

“Ağdaş rayon sakini, 1987-ci il təvəllüdlü Həmzəyeva Nərmin Oruc qızının əlilliyi həm elektron sistem üzərindən, həm də 26.05.2026-cı il tarixdə Dövlət Tibbi-Sosial Ekspertiza və Reabilitasiya Agentliyinin həkim-ekspertləri tərəfindən əyani baxış zamanı qiymətləndirilib.

Müayinə zamanı vətəndaşın hazırki sağlamlıq vəziyyətinin əlillik təyinatına əsas vermədiyi müəyyən edilib. Bu səbəbdən də qanunvericiliyə uyğun olaraq “Diaqnozun əlillik əlaməti təyin etməməsi” barədə qərar verilmişdir”.

Çimnaz Telmanqızı

Həmçinin oxuyun