Elmlər Akademiyasının ilk prezidenti  HAQQINDA MARAQLI FAKTLAR

Əsədulla Mir Ələsgər oğlu Mirqasımov 17 noyabr 1883-cü ildə Bakı şəhərində ruhani seminariyasının müəllimi ailəsində dünyaya göz açıb.

O, 1908-ci ildə gimnaziyanı bitirib və elə həmin illərdə ictimai fəaliyyətə başlayaraq dövrün mətbuatında Şərq ölkələrində müsəlman qadınlarının acınacaqlı vəziyyətinə dair məqalələrlə çıxış edib.

Ali təhsilini 1913-cü ildə Odessada yerləşən Novorossiya İmperator Universitetinin tibb fakültəsində tamamlayıb, üç il Odessada çalışdıqdan sonra 1916-cı ildə peşəkar cərrah kimi Bakıya qayıdıb.

Bakıya qayıtdıqdan sonra hərbi lazaretdə, 1 nömrəli doğum evində və Mixaylovsk xəstəxanasında çalışan Mir Əsədulla Mirqasımov qısa müddətdə böyük təcrübə qazanıb.

O, Azərbaycan Dövlət Universitetinin tibb fakültəsində pedaqoji fəaliyyətə cəlb edilərək əvvəlcə dosent, sonralar isə Azərbaycan Dövlət Tibb İnstitutunun hospital cərrahlığı kafedrasının müdiri kimi uzun illər yüksəkixtisaslı həkim kadrlarının yetişdirilməsinə rəhbərlik edib.

Azərbaycanda müasir tibb təhsilinin və milli cərrahiyyə məktəbinin əsasını qoyan simalardandır. O, 1927-ci ildə sidik yolları daş xəstəliklərinə dair tədqiqatını uğurla müdafiə edərək ölkənin ilk tibb elmləri doktoru və ilk azərbaycanlı alim-cərrahı adını qazanıb, 1929-cu ildə isə professor elmi dərəcəsinə layiq görülüb.

1945-ci ildə yaradılan Azərbaycan SSR Elmlər Akademiyasının təşkilatçılarından biri olub və yekdilliklə onun ilk prezidenti seçilib. 1947-ci ilə qədər akademiyaya rəhbərlik edən M. Mirqasımov həmçinin SSRİ Ali Sovetinin üç çağırış deputatı seçilib, elmi və ictimai xidmətlərinə görə "Lenin", iki "Qırmızı Əmək Bayrağı" və "Qırmızı Ulduz" ordenləri ilə təltif edilib.

Ömrünü bütövlüklə elmə və insan sağlamlığına həsr edən akademik  20 iyul 1958-ci ildə Bakıda vəfat edib. Onun ailəsi də Azərbaycan mədəniyyətinə böyük töhfələr verib; görkəmli heykəltəraş Mirəli Mirqasımovun, fizika-riyaziyyat elmləri doktoru Rüfət Mirqasımovun və tanınmış kinorejissor Oqtay Mirqasımovun atası, istedadlı aktrisa Ayan Mirqasımovanın (Oktay Mirqasımovun qızı) isə babasıdır.

JALƏ

Həmçinin oxuyun

Zakir Həsənov XƏSTƏLƏNDİ

Kombi istifadə edənlərin NƏZƏRİNƏ 

Türkiyə Prezidentinin Şuşada rəsmi qarşılanma mərasimi keçirilir - CANLI 

Ərdoğanın Azərbaycan səfərinin YENİ DETALLARI