Prezidentin geri qaytardığı qanun qəbul edildi - Hansı dəyişikliklər oldu?  

Prezidentin geri qaytardığı rəqəmsal güzəştlərlə bağlı qanun yenidən qəbul edilərək təsdiqlənib.

Oxu24.com  xəbər verir ki, İKT sahəsi üzrə ekspert Osman Gündüz sözügedən dəyişiklikləri şərh edib.

O əsas yenilikləri qeyd edib:

• Texnopark rezidentləri üçün müəyyən şərtlərlə 20 illik vergi və sosial sığorta güzəştləri nəzərdə tutulur.

• İri İT şirkətlərinin güzəştlərdən yararlanması yalnız ixrac göstəriciləri və ixrac gəlirlərinin ölkəyə daxil olması ilə şərtləndirilir. (Əvvəlki versiyada belə bir məhdudlaşma yox idi)

• Startaplara və vençur investisiyalarına yeni vergi təşviqləri tətbiq edilir.

• Frilanserlərin, rəqəmsal səyyahların və xarici İT mütəxəssislərinin fəaliyyəti üçün yeni hüquqi imkanlar yaradılır.

• İnnovativ məhsulların dövlət satınalmalarında iştirakı asanlaşdırılır, pilot layihələrin tətbiqi üçün mexanizmlər müəyyən edilir.

• Tədqiqat, innovasiya və yeni texnoloji məhsulların yaradılması üçün əlavə vergi təşviqləri nəzərdə tutulur.

Ekspertin sözlərinə görə, bu güzəştlər yerli ekosistemin inkişafının sürətləndirilməsi baxımından çox əhəmiyyətlidir: "Xüsusilə startapların dövlət satınalmalarına çıxışı, investorların təşviqi və iri şirkətlər üçün ixrac şərtləri sektorda yeni inkişaf imkanları aça bilər.

Dəyişikliklər böyük İT şirkətlərin də inkişafını stimullaşdıracaq, onların  dövlət sifarişlərindən asılılığını azaldacaq.

Bu dəyişikliklər həm də onların xarici bazarlara çıxışına, rəqabətqabiliyyətli texnoloji məhsullar yaratmasına və ölkəmizdə real əlavə dəyərin formalaşmasına ciddi stimul verəcək".

O. Gündüzün fikrincə, bu istiqamətdə dəyişikliklər xeyli gec reallaşıb: "İndi əsas məsələ qanunun necə tətbiq olunmasıdır. Xatırlayıram ki, əvvəllər güzəştlərdən yararlanan İT şirkətlərin texnopark rezidenti olaraq təsdiqi prosesi elə də şəffaf deyildi, qanunvericilikdə nəzərədə tutulan struktur formalaşmamışdı. Düşünürəm ki, güzəştlərin verilməsi şəffaf olmalı, nəticələri ölçülməli, dövlət dəstəyinin real iqtisadi faydası qiymətləndirilməlidir". 

Xatırladım ki, İT sektoruna geniş vergi və digər güzəştləri nəzərdə tutan qanun Prezident tərəfindən imzalanmadan yenidən baxılması üçün parlamentə qaytarılmışdı. Bu qanun Milli Məclis tərəfindən 14 iyulda qəbul edilmişdi. Bundan sonra Prezidentin köməkçisi Şahmar Mövsümov şəxsən parlamentdə iştirak edərək qanunun təkmilləşdirilmiş variantını təqdim etmişdi. Ölkə.az

Həmçinin oxuyun

Nazirlər Kabineti yeni QƏRAR VERİB

Evlənməyi planlaşdıranlar bunu BİLMƏLİDİR: Mütəxəssislə MÜZAKİRƏ

Həmin Saziş TƏSDİQLƏNDİ  — Prezidentin FƏRMANI

Qar yağacaq - XƏBƏRDARLIQ