İslam aləmində bu zirvəyə yüksələn ilk müsəlman qadın

CƏMİYYƏT

18.10.2026, 14:21

Xəbərlərimizi Google-da izləyin

Yeniliklərdən dərhal xəbərdar olun

Azərbaycanın və bütün Yaxın Şərq regionunun dənizçilik tarixində silinməz iz qoyan Şövkət Səlimova, həm ölkəmizin ilk qadın gəmi kapitanı, həm də İslam aləmində bu zirvəyə yüksələn ilk müsəlman qadın kimi adını salnamələrə həkk etmişdir.

Oxu24.com bildirir ki,Şövkət Səlimova 25 dekabr 1920-ci ildə Şamaxı qəzasının (indiki İsmayıllı rayonu) qədim Lahıc kəndində dünyaya göz açmışdır. Neftçi ailəsində boy-başa çatan Şövkət on uşaqlı böyük bir ailənin ən böyük övladı idi və uşaqlığı Bakı şəhərində keçmişdir.

Görkəmli dənizçi Anna Şetininanın (dünyanın ilk qadın gəmi kapitanı) portretindən ilhamlanaraq gələcək peşəsini seçən Səlimova, Bakı Dənizçilik Məktəbində təhsil almağa qərar verir. 1940-cı ildə bu təhsil ocağını uğurla başa vurduqdan sonra o, Qara Dəniz Gəmiçiliyi idarəsinə təyinat alır.

İkinci Dünya Müharibəsi illərində Şövkət Səlimovanın çiyinlərinə böyük məsuliyyət düşür. O, əvvəlcə gəmi kapitanının köməkçisi, sonralar isə kapitan kimi strateji vəzifələri icra edir. Müharibənin ağır günlərində Stalinqrad cəbhəsinə zəruri olan silah, sursat və yanacağı cəsarətlə daşıyır, geriyə isə yaralı döyüşçülərin Bakı və Krasnovodsk şəhərlərindəki xəstəxanalara təhlükəsiz təxliyəsini təmin edir.

Məhz bu xidmətləri ilə o, Azərbaycanın ilk qadın gəmi kapitanı və Yaxın Şərqin ilk müsəlman qadın kapitanı kimi böyük bir tarixi uğura imza atır.

Müharibədə göstərdiyi igidlik və fədakarlıqlara görə o, bir sıra yüksək dövlət təltiflərinə layiq görülmüşdür.

• "Qafqazın müdafiəsinə görə" medalı

• "1941–1945-ci illər Böyük Vətən Müharibəsində Almaniya üzərində Qələbəyə görə" medalı

• II dərəcəli Vətən Müharibəsi ordeni

• Qırmızı Ulduz ordeni

Cəbhə illərindən sonra Şövkət Səlimova öz bilik və təcrübəsini gənc nəslə ötürmək üçün Azərbaycan Dövlət Neft və Kimya Universitetində əmək fəaliyyətini davam etdirmişdir. Əfsanəvi kapitan 2 iyul 1999-cu ildə Bakı şəhərində dünyasını dəyişmişdir.

Onun şərəfli ömür yolu kinematoqrafçıların da diqqətindən kənarda qalmamışdır. 2025-ci ildə rejissor Asif Rüstəmovun quruluşunda onun həyatından bəhs edən "Şövkət" adlı bədii filmin çəkilişləri yekunlaşmışdır. Ekran əsərində Şövkət Səlimova obrazını Nəzrin Abdullayeva canlandırmışdır. Filmdə həmçinin Qurban İsmayılov, Hikmət Rəhimov, Elsevər Rəhimov və Nigar Mürsəlova kimi tanınmış aktyorlar rol almışlar.

Həmçinin oxuyun