Heç kimə nə can, nə də qan borcumuz yoxdur -    Ramidə Yaqubqızı YAZIR

Bütün dövrlərdə Azərbaycan kişisinin papağı, qadınının isə ləçəyi başında olub. Kişisi papağı qeyrət, namus hesab edib. Qadını isə örpəyini qandavasına, düşmənçiliyə sipər edib. Bir yaylıq təkcə, həya, abır təcəssümü yox, həm də töküləcək qanın, alınacaq canın xilaskarı olub. Biz, dəyərlərimizə hörmətlə yanaşdığımız kimi, onu qoruyub, saxlamağı da bacaran Xalqıq. 

İndi kimlərinsə gəlib Azərbaycanın daxili işlərinə burun soxması arzuolunan hal deyil. 

Xalq, dövlət olaraq nəyi, nə zaman və necə etməyi bilirik. Lütfən hərə öz qınına çəkilib, işi ilə məşğul olsun. Sürünmək istəyirsə, keçmişin qaranlıq dalanlarında mürgüləsin. 

Bizim işimizə qarışmasın. Heç kimə nə can, nə də qan borcumuz yoxdur. 

Suveren, müstəqil dövlətik. Öz qanunlarımız, adət-ənənələrimiz var. Bir yumruqda, bir amalda birləşib, cihada qalxmış, azadlığımızı və ərazi bütövlüyümüzü təmin etmişik. 

Biz, çıxış və giriş sərhədlərimizi bilən, tanıyan dövlətik. Nə kiminsə sərhədlərini keçirik, nə də kiməsə o ixtiyarı veririk ki, sərhədlərimizi keçsin. 

Son məqamda isə, xahiş yox, tələb edirik ki, heç kim Azərbaycanın daxili işlərinə müdaxilə etməsin. 

Qanunun aliliyinə sadiq qalaraq birnəfər kimi hamımızın borcudur ki, qoyulan tələb və təkliflərə əməl edək. Yad təsirlərə, yad həvəslərə meyillənməyək. 

Düşmən dəyirmanına su tökmək cahil, avam təbəqənin düşüncə tərzinə uyğundur. Qədim köklər üzərində inkişaf edən Azərbaycan müasir çağırışlara və tələblərə uyğun olaraq, cəhalətə və köləliyə yox deyir. 

Fanatizm və mövhumat isə keçmişin qalıqları kimi sökülüb, atılmalıdır. 

Dini əldə bayraq edənlər əgər, özlərini haqlı sayırlarsa, o zaman İslam dininin dəyərlərindən, elmindən bəhs etsinlər. Birhalda ki, Peyğəmbər buyurdu "Bir gün elm öyrənmək, qırx il ibadətdən üstündür". 

Övladlarınıza elm öyrədin, sevdirin. Onları qoruyun. Yox əgər, bunu edə bilmirsinizsə, onların inkişafına və irəli getməsinə şərait yaratmaq imkanınız yoxdursa, imkan verin bunu bacaranlar etsin. 

Biz xalq, dövlət olaraq böyük inkişaf mərhələsindəyik. Sağlam, savadlı, elmli gəncliklə işıqlı sabahlara getmək lazımdır. 

Xurafatın, cahilliyin kənar təsirlərinə uyub, qaranlıq keçmişə qayıtmaq yox. 

Gələcək daha işıqlı, xoşbəxtdir. Uşaqlarınızın əlindən bu xoşbəxtliyi almayın.

        Ramidə Yaqubqızı

Həmçinin oxuyun

Bakı sakinlərinin DİQQƏTİNƏ!19 oktyabrdan etibarən...

Türkiyə Azərbaycana dərs keçir - Bəs Ceyhan limanından İsrailə gedən neft? 

Bu, qardaş Türkiyənin birinci oyunu idi — Tarixi şəhərimiz xəritəmizdən SİLİNDİ

Tələbələrin təqaüdləri artırılacaq? - AÇIQLAMA