Bu il fındığın bol olduğu deyilir, amma problemlər çoxalıb

Ölkədə fındıq yığımı ilə bağlı nikbin fikirlər səsləndirilir. Keçən il məhsuldarlıq 4,6 faiz artmışdı. Bu il də fındığın bol olduğu deyilir. Amma fermerlər narazı görünür. Onlar problemlərin çoxalmasını dilə gətirir.

Oxu24.com  xəbər verir ki, məhsuldarlığın müəyyən qədər artmasında dövlət dəstəyi ilə minlərlə hektar yeni bağların salınması vacib rol oynayıb. Ümumi məhsul məhz sahələrin genişlənməsi sayəsində artır. Hərçənd bir hektardan əldə olunan məhsuldarlıq heç də ürəkaçan deyil. Burada iqlim amilini xüsusi qabardırlar. Ekspertlər isə deyir ki, peşəkar yanaşmanın olmaması ciddi nöqsanların ortaya çıxmasına rəvac verir.

İnfrastruktur problemləri illərdir həllini tapmır. Bəlkə də, ən çox qabardılmağı haqq edən çatışmazlıq fasiləsiz suvarma sistemlərinin olmamasıdır. Diqqət yetirsəniz, təkcə fındıqçılıqda yox, başqa sahələrdə də bu istiqamətdə büdrəyirik. Müasir suvarma sistemlərinin olmaması orta məhsuldarlığın yüksəlməsinə imkan vermir.

Fermerlərin heç də hamısı qənaətbəxş səviyyədə məhsul əldə etmir. Keyfiyyətli gübrə və pestisid çatışmazlığı sahibkarların qarşısını kəsir.

Öz təsərrüfatından məhsul götürməyə çalışan kəndlilər qiymətlərin aşağı olmasından gileylidir. Emal müəssisələri inhisar mühiti yaradaraq onları qeyri-məqbul şərtlərlə üz-üzə qoyur. Məhsulunu dəyər-dəyməzə satmalı olan kəndli həvəsdən düşür, bu sahədən uzaqlaşır. Halbuki kənd təsərrüfatında kiçik sahibkarlara, işə canını qoyan kəndliyə çox ehtiyac var.

İxracın fiziki həcmi də çox azalıb. Bir müddət əvvəl bununla bağlı statistika açıqlanmışdı. Məlum olmuşdu ki, 22,5 faiz azalmadan söhbət gedir.

Fındıq qiymətlərinin payızda yüksələcəyi gözlənilir. Bu, fermerlərin işinə yaraya bilər. Amma gərək inhisar mühiti aradan qaldırılsın. Suvarma sistemlərinə əncam çəkilsin, sahələr keyfiyyətli gübdə, pestisidlə təmin olunsun. Yeni sahələr hesabına müəyyən məhsul artımı ilə qürrələnməkdənsə, çatışmazlıqlar aradan qaldırılmalıdır.

Həmçinin oxuyun

İşləyən şəxslərə VACİB XƏBƏR: Məzuniyyət belə veriləcək

Məktəbli faciəli şəkildə həyatını itirdi  - FOTO

5 oktyabrda bu bürclərə uğurlu olacaq   —  ULDUZ FALI

10 gün ərzində qeydiyyata düşməyənləri CƏRİMƏ GÖZLƏYİR – Hüquqşünas açıqladı