Qara ciyər yağlanması ürək xəstəliklərinin səbəbi ola bilər- Kardioloqdan xəbərdarlıq  

Qara ciyərin yağlanması çox vaxt yalnız həzm sistemi ilə bağlı problem kimi qəbul edilir. Lakin həkimlər bildirir ki, bu vəziyyət ürək-damar sisteminə də təsir göstərə bilər. Xüsusilə alkoqolla əlaqəsi olmayan qara ciyər yağlanması xolesterin mübadiləsinin pozulmasına səbəb ola bilər ki, bu da uzun müddətdə ürək problemlərinin yaranma riskini artırır.

Kardioloq Azər Mustafayev Oxu24.com-a açıqlamasında qara ciyər yağlanması ilə ürək xəstəlikləri arasındakı əlaqəyə toxunub. O bildirib ki, ilk baxışda bu iki orqan bir-biri ilə əlaqəsiz görünsə də, qara ciyər yağlanması ürək problemlərinin səbəblərindən biri hesab oluna bilər. Həkim vurğulayıb ki, söhbət alkoqolsuz qara ciyər yağlanmasından gedir.

Mütəxəssisin sözlərinə görə, bu halda orqanizmdə xolesterin mübadiləsi pozulur. Xolesterinin səviyyəsi yüksəldikdə o, damar divarlarında toplanır və ürək damarlarında problemlərin yaranmasına zəmin yaradır. Zaman keçdikcə bu proses ürək xəstəliklərinə gətirib çıxara bilər.

A.Mustafayev qeyd edib ki, qara ciyər yağlanması olan xəstələr bu vəziyyətə ciddi yanaşmalı, onu diqqətdən kənarda qoymamalıdırlar. Həkimin fikrincə, problemin vaxtında müalicəsinə başlamaq həm qara ciyərin, həm də ürəyin sağlamlığının qorunması baxımından vacibdir.

Kardioloq həmçinin vurğulayıb ki, bu proses qısa müddətdə baş vermir. Onun sözlərinə görə, "bu gün qara ciyərim yağlanıb, sabah ürək xəstəliyi yaranacaq" kimi bir vəziyyət olmur. Ürək problemləri tədricən, bir neçə il ərzində formalaşır. Məhz buna görə də xəstələr problemin ağırlaşmasını gözləməməli, qara ciyər yağlanmasını erkən mərhələdə müalicə etdirməlidirlər.

Müalicə üsullarından danışan A.Mustafayev bildirib ki, qara ciyər yağlanmasının müalicəsində əsasən reabilitasiya prosedurlarından, pəhrizdən və fiziki hərəkətdən istifadə olunur. Həkim xəstələrə müalicə prosesinə məsuliyyətlə yanaşmağı və mütəxəssislərin tövsiyələrinə əməl etməyi məsləhət görüb.

Mütəxəssislər xəbərdarlıq edirlər ki, qara ciyər yağlanması və ya xolesterin mübadiləsinin pozulması ilə bağlı şübhə yarandıqda özbaşına müalicəyə başlamaq düzgün deyil. Belə hallarda həkimə müraciət edərək müayinədən keçmək və fərdi müalicə planı almaq lazımdır.

 Nigar

Həmçinin oxuyun

Nazirlər Kabineti yeni QƏRAR VERİB

Evlənməyi planlaşdıranlar bunu BİLMƏLİDİR: Mütəxəssislə MÜZAKİRƏ

Həmin Saziş TƏSDİQLƏNDİ  — Prezidentin FƏRMANI

Qar yağacaq - XƏBƏRDARLIQ