Əməliyyatdan sonra ağrıkəsicilər içənlərə XƏBƏRDARLIQ: Təhlükə var!

Cərrahi əməliyyatdan sonrakı ilk günlər sağalma prosesində ən həssas dövr hesab olunur. Bu mərhələdə xəstələrin çoxu ağrını azaltmaq üçün evdə mövcud olan ağrıkəsicilərə müraciət edir. Lakin mütəxəssislər xəbərdarlıq edir ki, hər ağrıkəsici əməliyyatdan sonrakı dövrdə təhlükəsiz deyil. Yanlış seçilmiş dərman qanaxma riskini artıra, sağalma prosesini çətinləşdirə və əlavə fəsadlara yol aça bilər. Bəs əməliyyatdan sonra hansı ağrıkəsicilərdən, hansı vaxt istifadə etmək olar?

LOR cərrah Mehrdad Yaveri mövzu ilə bağlı Oxu24.com-a açıqlamasında əməliyyatdan sonra ağrıkəsici dərmanların qəbulu qaydasını izah edib. O bildirib ki, əməliyyatdan sonrakı ilk 2 gündə ağrıları aradan qaldırmaq üçün yalnız və yalnız parasetamol tərkibli tabletlərdən istifadə etmək olar. 

Cərrah vurğulayıb ki, dərmanın dozası xəstənin yaşına və çəkisinə uyğun olaraq müəyyən edilməlidir və bu məsələdə özbaşına qərar verməmək lazımdır.

Mütəxəssisin sözlərinə görə, ibuprofen tərkibli dərmanlar əməliyyatdan sonrakı ilk 2 gündə qəti şəkildə qadağandır. Bura ketoprofen, naproksen, nurofen və bu qrupa daxil olan digər preparatlar aiddir.

Həkim izah edib ki, bu dərmanlar qanı durultmaq xüsusiyyətinə malikdir və qanaxma riskini artırır. Əməliyyatdan sonrakı ilk günlərdə isə əməliyyat nahiyəsində qanaxma ehtimalı ən yüksək olur. Buna görə də bu dövrdə qanı durultan preparatların qəbulu xəstənin vəziyyətini ağırlaşdıra və təcili tibbi müdaxilə tələb edən fəsadlara səbəb ola bilər.

M.Yaveri qeyd edib ki, qeyri-steroid iltihabəleyhinə dərmanlar qrupuna aid olan preparatlardan, o cümlədən nurofen və ketoprofendən ancaq əməliyyatın 3-cü günündən etibarən istifadə etmək olar.

Onun sözlərinə görə, bu dərmanlar həm ağrını azaltmaq, həm də iltihabı sakitləşdirmək baxımından təsirli hesab edilir, lakin onların vaxtından əvvəl qəbulu yaxşılıq əvəzinə ziyan gətirə bilər. Cərrah xəstələrə bu müddətə ciddi riayət etməyi tövsiyə edib.

Cərrah əlavə edib ki, əməliyyatdan sonra ağrıkəsici seçərkən xəstələr yalnız öz hisslərinə və ya yaxınlarının məsləhətlərinə əsaslanmamalıdırlar. Onun fikrincə, bir çox hallarda insanlar “ağrı keçsin” deyə əlində olan ilk dərmanı qəbul edir, bu isə gözlənilməz nəticələrə yol aça bilər. Xüsusilə əməliyyatdan sonra qanaxma riski yüksək olan xəstələr üçün dərmanların düzgün seçilməsi həyati əhəmiyyət daşıyır.

M.Yaveri vətəndaşlara tövsiyə edib ki, əməliyyatdan sonra istifadə ediləcək dərmanlar barədə əməliyyatı aparan həkimlə əvvəlcədən məsləhətləşsinlər. Onun sözlərinə görə, hər xəstənin sağlamlıq vəziyyəti, qəbul etdiyi digər dərmanlar və əməliyyatın xarakteri fərqli ola bilər, buna görə də ağrıkəsici barədə yekun qərarı müalicə edən həkim verməlidir. Ağrı güclənərsə, əməliyyat nahiyəsində qanaxma, şişkinlik və ya digər qeyri-adi əlamətlər yaranarsa, gecikmədən həkimə müraciət etmək lazımdır.

Cərrah vurğulayıb ki, düzgün ağrıkəsici rejiminə əməl etmək həm xəstənin əməliyyatdan sonrakı dövrü daha rahat keçirməsinə, həm də sağalma prosesinin fəsadsız başa çatmasına kömək edir.

Jalə

Həmçinin oxuyun

Putin üçün uzunömürlülük axtarışı: 7 min meymun...

Sahil Babayev açıqladı: Gələn il pensiyalar bu qədər artacaq

Prezidentlərin diqqətini çəkən XTQ zabiti kimdir?

Müraciətlərin qəbuluna noyabrın 13-də, saat 15:00-dan başlanılacaq