Ağciyər emfizeması hansı hallarda əməliyyat tələb edir?

TİBB

312

15.09.2026, 17:45

Xəbərlərimizi Google-da izləyin

Yeniliklərdən dərhal xəbərdar olun

Ağciyər emfizeması tənəffüs sisteminin xroniki xəstəliklərindən biridir. Xəstəlik zamanı ağciyərlərdəki alveolların həcmi böyüyür, divarları nazikləşir və normal ağciyər toxuması öz funksiyasını itirir.

Məsələ ilə bağlı Oxu24.com-a açıqlama verən Torakal cərrah Op. Dr. Fəyyaz Məmmədov bildirib ki, emfizemanın yaranmasına əsasən siqaret çəkmək və uzun müddət tozlu mühitdə nəfəs almaq kimi amillər təsir göstərir.

Mütəxəssisin sözlərinə görə, xəstəliyin əsas əlamətlərindən biri təngənəfəslikdir. Ağciyər toxumasının funksiyasını itirməsi nəfəs çatışmazlığına səbəb ola və uzun müddətdə ürək-damar sisteminə də təsir göstərə bilər. Bu səbəbdən təngənəfəslik yaşayan şəxslərin pulmonoloqa müraciət etməsi və müayinədən keçməsi tövsiyə olunur:

“Emfizemanın digər təhlükəli fəsadlarından biri isə pnevmotoraksdır. Ağciyərdə yaranan bullaların, yəni hava ilə dolu boşluqların partlaması nəticəsində hava plevral boşluğa daxil ola və ağciyərin yığılmasına səbəb ola bilər. Bu zaman nəfəs alma çətinləşir və vəziyyət təcili tibbi müdaxilə tələb edir”.

Fəyyaz Məmmədov qeyd edib ki, pnevmotoraks zamanı plevral boşluğa drenaj qoyularaq hava xaric edilir və ağciyərin yenidən açılması təmin olunur. Lakin bu müdaxilə emfizemanın özünü aradan qaldırmır, əsasən onun yaratdığı fəsadı müalicə edir.

Həkimin sözlərinə görə, pnevmotoraks ən azı iki dəfə təkrarlanarsa, xəstəyə cərrahi əməliyyat təklif oluna bilər. Qapalı, yəni endoskopik üsulla aparılan əməliyyat zamanı ağciyərdəki kistalar rezeksiya edilir və plevrektomiya həyata keçirilir. Bununla ağciyərin döş qəfəsinin divarına yapışması təmin olunur və gələcəkdə pnevmotoraksın təkrarlanma riski azaldılır.

Nigar

Həmçinin oxuyun