Qanda piylərin yüksək olması hansı təhlükələrə səbəb ola bilər? – Kardioloqdan XƏBƏRDARLIQ  

Qanda xolesterinin yüksək olması uzun müddət heç bir əlamət vermədən inkişaf edə və zamanla damar sağlamlığı üçün ciddi risklər yarada bilər. Xüsusilə düzgün olmayan qidalanma, yağlı qidaların həddindən artıq qəbulu və digər risk faktorları xolesterin səviyyəsinin yüksəlməsinə səbəb ola bilər.

Oxu24.com xəbər verir ki, kardioloq Aynur Məmmədova qanda piylərin yüksək olmasının yaratdığı risklər və vaxtında nəzarətin əhəmiyyəti barədə saytımıza danışıb.

Həkimin sözlərinə görə, bəzi pasiyentlər həkimə yorğunluq, halsızlıq və zəiflik kimi ümumi şikayətlərlə müraciət edir. Aparılan müayinələr zamanı isə qanda xolesterinin yüksək olduğu aşkarlanır.

Kardioloq bildirib ki, pasiyentin qidalanma vərdişləri də bu baxımdan əhəmiyyətlidir. Xüsusilə piyli ət və digər yağlı qidaların mütəmadi və həddindən artıq istehlakı xolesterin səviyyəsinin yüksəlməsinə təsir göstərə bilər:

“Yüksək xolesterinin əsas təhlükələrindən biri onun uzun müddət simptomsuz davam edə bilməsidir. Qanda xolesterinin, xüsusilə “pis” LDL xolesterinin yüksək olması damar divarlarında aterosklerotik lövhələrin yaranmasına və damarların daralmasına şərait yarada bilər”.

Bu proses nəzarətsiz qaldıqda ürək-damar xəstəlikləri, o cümlədən infarkt və insult riskini artıra bilər. Həkim vurğulayıb ki, problem yalnız ürək damarları ilə məhdudlaşmır, müxtəlif orqanları qidalandıran damarlarda da qan dövranının pozulmasına səbəb ola bilər.

Aynur Məmmədova bildirib ki, digər analizlərin normal olması qanda xolesterinin yüksəkliyini əhəmiyyətsiz etmir. Buna görə də lipid göstəricilərinin vaxtında yoxlanılması, risk faktorlarının müəyyənləşdirilməsi və nəticələrə uyğun tibbi nəzarətin aparılması vacibdir.

Kardioloq insanlara qidalanmaya diqqət etməyi, yağlı qidaların qəbulunu məhdudlaşdırmağı və mütəmadi tibbi müayinələrdən keçməyi tövsiyə edib. Onun sözlərinə görə, xolesterinin vaxtında aşkarlanması və nəzarətdə saxlanılması gələcək ürək-damar fəsadlarının riskini azaltmaq baxımından mühüm əhəmiyyət daşıyır.

Jalə

Həmçinin oxuyun

Həmin davaya görə tanınmış idmançı HƏBS EDİLDİ - FOTO

Davada həyatını itirən Ceyhunun oğlu KİMDİR? -FOTO

Yeni detallar üzə çıxıb:Dava Ceyhunun oğluna görə olubmuş

Bakıda söküləcək binaların yerləri açıqlandı - SİYAHI